amalinks wokungena

Breaking News

Umqeqetshi uTonderai Ndiraya Usola Abadlali Kulandela Ukunqotshwa Kweqembu leZimbabwe Under-20


Tonderai Ndiraya

Umqeqetshi weqembu lamajaha aleminyaka engaphansi kwamatshumi amabili elimela ilizwe emdlalweni wenguqu, uTonderai Ndiraya, usola abadlali ngemva kokuphelelwa ngumphako kweqembu leli kumncintiswano weCOSAFA oqhutshelwa kwele South Africa kulezinsuku.

UNdiraya utshele intathelizindaba ekupheleni komdlalo weqembu lakhe lele Mozambique, wona ophele iqembu leMozambique linqobe nge2 ka nya, ukuba imbangela yokunqotshwa kweqembu lakhe yikuba abadlali alabo kabaphekekanga bavuthwa kuhle.

“Ungakhangela obekusilela kuqembu lami yikungenelisi ukutshaya ibhola liqonde esangweni lokunye nje okudingakala ukuba umuntu adlale ibhola. Ngitsho izinto esikhangelele ukuba wonke umdlali wenguqu ezenelise njalo nxa abadlali besehluleka ukuzenza kusuka kube nzima.

Lo ngumbiko okumele siwutshele abayibo abakhulisa abadlali laba singaphindela ekhaya ukuze abadlali bekhuliswe kuhle. Kuyadanisa ukunqotshwa ngalindlela kodwa yikho okwenzakeleyo.”

Intathelizindaba yezemidlalo uNash Mkokwayarira uthi uNdiraya katshiyananga ngitsho lomuntu obazayo othi angabaza izinto ezingacaciyo abesesola izando lezipikili zakhe. “Kuyinhlamba enkulu kubaqeqetshi babadlali abasakhulayo ukuzwa umqeqetshi we Under 23 uTonderai Ndiraya ekhala ngokuba abafana abakhuliswanga kuhle. Umlandu udla yena ngoba nguye owazikhethela abadlali ayebafuna.

Aluba wayengomunye ngabe wakhulumisana labaqeqetshi abasebenza labasakhulayo bamupha abadlali asebevuthiwe ngoba labo bakhala ngaye ukuba watshiya abafana okwakumele babe yingxenye yeqembu leli elidlala ku COSAFA.”

UNdiraya nguye ophiwe umsebenzi wokuqeqetsha iqembu lamajaha aleminyaka engaphansi kwamatshumi amabili kumncintiswano we COSAFA loba nje yena engumqeqetshi weqembu lamajaha aleminyaka engaphansi kwamatshumi amabili lantathu aphinde njalo abe ngumsekeli kamqeqetshi weqembu lama Warriors.

UPhilani Ncube nguye owayekhethwe ukuba ngumqeqetshi weqembu lama Under 20 ngesikhathi kusethulwa amagama abaqeqetshi bamaqembu esizwe.

Iqembu le Zimbabwe lihlezi endaweni yesithathu engalaneni yesibaya sika Group A lilomklomelo owodwa eliwuthole ngemva kokuba libe ngutshiki lobhanqa 2 ka 2 leqembu le South Africa emdlalweni walo wakuqala.

Emdlalweni walo wesithathu njalo ungowokucina kumidlalo yezibaya iqembu le Zimbabwe lizadlala lele Lesotho okuyilo elihlezi emsileni lingela ngitsho lowodwa umklomelo.

Phezu kwengalane kuhlezi iqembu le Mozambique lona elilemiklomelo eyisithupha kuthi ele South Africa lisendaweni yesibili lilemiklomelo emine.

Amaqembu azaphutsha imidlalo yezibaya ehlezi phezu kwengalane yezibaya ezintathu azadlulela kusigaba esilandelayo ese semi – final ndawonye leqembu elizabe lilemiklomelo eminengi kulawo azaqeda imidlalo yezibaya esendaweni yesibili.

Facebook Forum

XS
SM
MD
LG