amalinks wokungena

Breaking News

Tsenengamu: UMnangagwa loChamisa Kabakhulumisane Balungisise Okuhluphayo Elizweni


Osakhulayo osanda kumiswa ukuba lilunga leZanu PF, uGodfery Tsenengamu
Osakhulayo osanda kumiswa ukuba lilunga leZanu PF, uGodfery Tsenengamu

Osakhulayo osanda kumiswa ukuba lilunga leZanu PF, uGodfery Tsenengamu ukhuthaza inkokheli yamabandla amabili amakhulu ezombusazwe aphikisanayo umnumzana Emmerson Mnangagwa oweZanu PF loMnu. Nelson Chamisa oweMDC ukuthi bazoxoxisane lozulu kudingwe indlela yokulungisisa isimo sezombusazwe.

UTsenengamu uveze lokhu emhlanganweni lentathelizindaba owenzelwe e Media Centre e Harare ngoLwesihlanu. Udubo lwenkohlakalo elizweni soluyisindabaphendule ngakhoke ukhuthaza uzulu ukuthi aphakame alwisane lalo kungakhathalekile ukuthi ungowaliphi ibandla.

“Ngifuna ukuyibuza linkokheli ukuba kuyini okwehlulayo ukuthi lihlangane? Udubo sibi sibili olwenza lingahlangani ukuthi likhulumisane, kuyini? Kambe kudinga ukuthi Uzulu weZimbabwe angene ezitaladeni, etshengisela, abantu balimazane ukuthi libone ukuthi kulesidingo sokuthi lisebenzisane. Angitsho ukuba Makumbe lohulumende womanyano lanxa ngingaphikisani lalowo mbono, kodwa ngiyazi ukuthi bazothola indlela eying nxa bengakhulumisana.”

Isiphathamandla sohlangothi lwabasakhulayo kuMDC ekhokhelwa ngumnumzana Chamisa, uOstallos Gift Siziba uthi limqotho lelo eselikhulunywa ngu Tsenengamu.

“Amazwi akhulunywa ngu Godfery Tsenengamu amqotho, mayelana lokuthi ke kube lokuhlanganiswa kwamabandla, kwabomongameli bamabandla eZanu Pf le MDC, kuyinto eqakathekileyo ngoba kuyikho okwenza ukuthi ilizwe lingayi phambili. Sikhangelele ukuba umnumzana Mnangagwa lo mongameli Advocate Nelson Chamisa abayibo abathungamela amabandla amakhulu elizweni, ukukhulumisana kwabo kuyanceda ukubana ilizwe liye phambili. Njalo ke lokhu kutshengisa ukuthi uGodfery Tsenengamu ubona ukubana inhlanganiso yePOLAD ayisiyo engayenza ukubana abantu behlangane njalo engahambisa ilizwe phambili.”

Kodwa umsekeli kanobhala ehlangothini lwabasakhulayo kuZanu PF, uMabutho Moyo uphambana lokukhuluvunyelanwa ngababili labo okokuthi uMnangagwa loChamisa bakhulumisane.

“Sihambile ekhethweni ngomnyaka ka 2018 ubaba uMnangagwa wangqoba, wangqoba okuzwayo sibili okubonisa ukuthi abantu beZimbabwe bamnike ithemba njalo ibandla lezanu pf elinika I two thirds majority eParliament, asingeke sithi abantu beZimbabwe bekhethile sibe sesithi thina hayi kumele kukhulunyisanwe, kukhulunywani? Kukhulunywani khona ukhetho lwenziwe?. I Zimbabwe lilizwe elileConstitution, i Zimbabwe lilizwe eliledemocracy ngakho i democracy izakuba khona njalo ngo 2023. Okwakhathezi, abantu abavumele ubaba uMnangagwa abuse, ubaba uMnangagwa alungise ilizwe.”

Okudingwa nguzulu weZimbabwe uMoyo ethi yikubona isimo somnotho silungisiswa hatshi ukukhulumisana kwenkokheli ezimbili lezi ngoba singekho isizatho salokho.

“Lokho okokuthi umongameli owelizwe kumele ahlangane loChamisa ukuze bakhulumisane asonto emqoka, asonto eqakathekileyo khathesi nxa sikhangele entweni eziqakathekileyo ezifunwa ngabantu beZimbabwe. Abantu beZimbabwe khathesi bakhangelele ukuthi isimo somnotho sibe nganeno because iyananzelela ukuthi kulobunzima obukhona ngakho ke uhulumende weZanu Pf usebenza gadalala ukuthi isimo somnotho sibe nganeno. Lokhu okokuthi ubaba uMnangagwa kumele ahlangane ahlangane lomnumzana uChamisa, asonto eqakathekileyo khathesi ”.

Eyinye ingcwethi ezocubungula ezombusazwe owenhlanganiso yeZimbabwe Democracy Institute – ZDI umnumzana Bekezela Gumbo uthi lanxa kungumbono omuhle akaboni kusenzakala.

“Uyabona isituation okumele ibe khona yileyana eyokuthi uChamisa ehleli ehofisini yakhe kumele ebone ukuthi nxa engsakhulumisananga loMnangagwa, akatholi lutho. LoMnangagwa laye kumele ebone ukuthi nxa engasakhulumisananga lo Chamisa, akulanto oyiwinayo. I situation enjalo kasikafiki kiyo thina njengelizwe.”

Omunye wakhe uTsenengamu uLewis Matutu ubengekho kulomhlangano lanxa bekumele babendawonye njengalokho abakwenza kowakuqala lapho ababetha khona amagama alabo ababakhokhelayo kwezenkohlakalo eZimbabwe.

Uthethe lelithuba uTsenengamu ukuveza uhlelo we Zim-First Agenda lapho anxunse abasakhulayo bonke ukuba basebenzelane ukulwisana lemisebenzi yenkohlakalo elizweni.

Udaba lukaTsenengamu ekhuthaza ukukhulumisana elizweni siluphiwa nguMavis Gama
please wait

No media source currently available

0:00 0:04:37 0:00
XS
SM
MD
LG