Umkhokheli weMDC-T, uMnu Morgan Tsvangirai, uthi uzulu kumele ebambane phambilini kokhetho njalo abantu bebhalise ukuvota ngobunengi.
Embikweni awethule ngMvulo, uTsvangirai uthe kuqakathekile ukuthi umanyano wamabandla aphikisayo ozanywayo umumathe inhlanganiso ezimela uzulu kunhlangothi zonke zempilo ezigoqela ezokholo, ezabesifazana lezabafundi.
UTsvangirai wengeze wathi sesifikile isikhathi sokuthi amabandla aphikisayo ebambane ukuze esuse ibandla leZanu PF embusweni ngoba selehlulekile ukubusa kuhle nanku umnotho welizwe uqhubeka usiya kogoqanyawo.
Uthe njalo abasekeli beZanu PF kanye labakubutho kabamelanga besabe inguquko engaba khona alubana umanyano wamabandla aphikisayo lo uthe wanqoba kukhetho wangena embusweni.
“Udubo esilalo kathesi ayisilodubo lweMDC kuphela. Ludubo lomntwana weZimbabwe wonke; ngakho kuyadingeka ukuthi abantu babambane kukhitshwe iZanu PF embusweni,” kutsho umsekeli wesikhulumeli seMDC-T uNkosazana Thabitha Khumalo egcizelela amazwe kaTsvangirai.
Ingcwethi kwezombusazwe uDr Nkululeko Sibanda yena uthe umanyano ubungaphumelela alubana abamabandla ezombusazwe baqala bakhulumisana bebodwa bengakamememi abokholo lezinye inhlanganiso ukuthi bebambisane.