amalinks wokungena

Breaking News

U-2020 Ubungumnyaka Wezimfa, Imikhuhlane, Lobuyanga Kutsho abeZimbabwe AbaseSouth Africa


Abakumsebenzi wokulungisa inzipho abadabuka eZimbabawe asebehlala kweleSouth Africa.

Izizalwane zeZimbabwe kweleSouth Africa zithi umnyaka ka2020 ubunzima kulayo yonke iminyaka asebeke bayiphila besemazweni. Inengi lazo zichaza lumnyaka njengomnyaka wenyembezi, imikhuhlane, indlala lobuyanga.

Kwezempilakahle abanengi bathi baqede umnyaka bephilela evalweni njengoba igciwane leCoronavirus belisidla amahabulo lahlasela abantu abedlula isigidi (over 1 million) kwafa phose abazinkulungwane ezingamatshumi amathathu (close to 30,000).

Umnumnzana Bornman Khumalo, isikhulumeli senkosi yakwaMthwakazi uBulelani Lobhengula Khumalo, uthi malutshwana amazwi angachaza usizi luka2020.

“Abafana ngapha kumaWhatsapp bathi asidilithenini u2020. Ube yidisaster ngesilungu. Silahlekelwe ngabantu abanengi. Ubuhlungu baleyonto yikuthi umuntu wakho ubethi loba egula esibhedlela ubungenelisi ukumvakatshela, Bekusithi lanxa esesiyabekwa kuthunyelwenje isidumbu khonale ekhaya engakhatshwa muntu.”

Esinye isizalwane seZimbabwe obuye njalo abeyisikhulumeli sebandla leThe Patriotic Front umnumnzana Mxolisi Ncube uthi u2020 ubhidlize wonke amacebo abantu.

“Umnyaka ka 2020 ngingathi ngumnyaka ongazange ube khona ngoba sithe singena u2020 kwaqala indaba yecorona savalelwa ezindlini. Lanxa sesivulelwa into zonke azisahambanga kahle ngenxa yokuthi besesisenza izinto silokuvaleleka kwezinye izindlela lama plans ethu akade siwenzile awomnyaka acine engasaphumelelanga.”

Umnumnzana Nkosini Tshuma, uthi ubunzima buka2020 akabuzwanga ngelikabathi kodwa ububone ngawakhe wabubamba ngezandla.

“U2020 ubengumnyaka omubi kakhulu lapho esibone khona abantu abanengi belahlekelwa zimpilo zabo kakhulu. Lami ngingomunye olahlekelwe ngumzali ongumama ngehluleka lokuthi ngiyembeka ngesizatho esisaziyo sonke ese lockdown.”

Umnumnzana Godfree Viki uthi akusakhulunywake ngezomnotho njengoba amankampani amanengi ehle avalwa izinkulungwane zabantu zasala zingelamsebenzi.

“Uyear 2020 ube ngumnyaka omubi kakhulu ebantwini ngoba impilo zabo zintshintshiwe. Indlela abebephila ngayo isuke yama baphila ngenye indlela akade bengayijayelanga. Belahlekelwa yizihlobo ezinengi ezibulewe yicoronavirus. Amankampani avalwa imisebenzi yalahleka. Kube ngumnyaka omubi kakhulu.”

Inhlalo kazulu layo ithinteke kakhulu njengoba abantu bebesenqatshelwa ukuvakatshelana kanye lokuqhuba imbuthano yemideni.

Okhokhela ibandla lamaZiyoni kweleSouth Africa njalo engusomabhizimusi umnumnzana Dan Maphalala Mabunda, uthi ngumnyaka ovale izinkonzo amaKristu aphendulwa abahedeni.

“UPresident wethu uArchbishop uHadebe laye wasitshiya ngoJune ngayonale into leyo ibaqedile abantu. Namanje amabhizinesi aphelile. Abantu bethu abaselamsebenzi. Avaliwe ama restaurants. Nasesikolweni ingane zethu asazi ziyakwenzakanjani kulo umnyaka ozayo.”

Ubunzima bempilo buqubule imimoya yexenophobia okwenze inengi lezizalwane zeZimbabwe liphilele evalweni ngenxa yamaqembu afana le Put South Africa First akade efuna ukususela abakwamanye amazwe amanqe.

Abatshayeli bamaroli beZimbabwe labo bathi baqede umnyaka bevikana lokufa inhlanganiso zabatshayeli bakweleSouth Africa zifuna bephume baphele elizweni.

Inengike lithi okubuhlungu yikuthi bathe ngokuphelelwa yimisebenzi, bazithola sebexotshiwe lapho abahlala khona kwazise lendlala ibizenzela umathanda sebephila ngokucela.

Umfundi wakweleSouth Africa uLitha Vuke uthi ube ngumnyaka ohlukumeze kakhulu abafundi.

“Ubengunyaka omasikizi. Unyaka osokolisileyo kwayo obunengxaki ezahlukileyo kuleyo esiyaziyo phambilini. Nabafundi kunye notitshala kwafuneka ukuba bafune ndlela zimbi zokuba bakwazi ukugqibezela unyaka abafundi bangafeyili beqhelisane nendlela ezihlukileyo zokufunda.”

Kantike osekela imisebenzi yabaculi labalingisi uPhakamani Nkomo odume ngelithi PK uthi inengi labaculi lisele seliyiziceli.

“Siphazamiseke kakhulu generally nje I think wonke ama artists they were affected ngama lockdown regulations because as a result besingakwazi ukwenza ama events. Nothing was happening.”

Abanye bathi ukuvalwa kwemingcele kutshiye izihlobo zabo eZimbabwe zilamba okwamagama njengoba bekungaselandlela yokubathumela ukudla, kanti indlela ezilutshwana ebezikhona besezidula okwamagama.

Inengike lithi longumnyaka abangasoke bawubale nxa bebala iminyaka abayiphilayo ngobalo, abazange bawuphile.

Udaba lwabeZimbabwe abaseSouth Africa besitsho ukuba ubaphathe njani umnyaka ka2020 siluphiwa nguThuso Khumalo
please wait

No media source currently available

0:00 0:04:53 0:00

Facebook Forum

XS
SM
MD
LG