amalinks wokungena

Breaking News

U-Bulawayo Umanyana Lamazwe Abensundu Ukunanza i-Africa Day


Africa Day.
Africa Day.

U-Bulawayo unanze ilanga leAfrica Day, esipha imibono ehlukeneyo ngokuhlonitshwa kwelanga leli, ngalesi sikhathi umhlaba ubhekane lohlupho lobhubhane lweCovid-19 osolutshaye lwabhidliza umnotho emazweni amanengi awezwekazi leAfrica okade uvele udonsa nzima, okugoqela ele Zimbabwe.

Bezingaqhize qhakala izakhamizi zakoBulawayo lamhlanje lapho lunanzwa ilanga leAfrica Day ziziqhubela imisebenzi ehlukeneyo emakhaya lakumabhizimusi azo.

URetired Col. Tshinga Dube ube lengxoxo lentathelizindaba, eBulawayo Media Centre lapho akhuthaze ukuba abantu kumele baziqhenye ngobuAfrica babo, lanxanje kulizwekazi elibhekane lenhlupho ezithile.

“Kuzalunga lamuhla sithakazelela ilanga likaAfrica yonke elilizwe elikhulu elilenhlupho ezehlukeneyo kusiya ngelizwe. ICovid ibulele lentshantshu zamazwe, sithemba uNkulunkulu ukuba kuzadlula njalo okuqakathekileyo yikuba silandele imilayo yokuvikela lumkhuhlane.”

Isakhamuzi sakoBulawayo uMnu Mkhokheli Nyathi uthi iAfrica Day sokulikhefu elingaqakathekanga kangako ngoba balutshwana elibanika isikhathi sokuphumula.

“Ngokubona kwami abantu iAfrica Day abasayikhangeli kakhulu ngoba bayazisebenza lokuthi bahlale ezindlini akula abangakwenza ngibona ukuba abalanto zokwenza ngakho bayabe bedinga imali.”

UMnu Mathew Sibanda uthi ilanga leAfrica Day limkhumbuza inhlungu ezabakhona ilizwe selitholile uzibuse, ezinjengombhuqazwe weGukurahundi.

"Silabafowethu, abanawethu labazali abagqitshelwa khonalapha ebhalagwe bephila bengela cala bebulawa ngesizatho sokulwa ngemihlobo hatshi ngezombangazwe sezibuya ukulwa lamabhunu ilizwe selikhululekile kwabulawa abantu abangamaZPRA lamaZAPU, kwabulawa abafowethu, abananewethu labazali"

Olwela amalungelo oluntu uMnu Effie Ncube uthi iAfrica Day ayisela sisindo ngoba kunengi okudinga ukulungisiswa.

“l-Africa Day ayincedi lutho uma kungahlonitshwa amalungelo oluntu ngoba iAfrica ekhululekileyo yiyo eyayilwelwa ngabantu kuyo yonke iAfrica sibona ukhetho olungaqhutshwa kahle, amalungelo abantu awahlonitshwa kuqakathekileyo yikuba abantu bavukele yonke imibuso elobandlululo.”

Amazwe awezwekazi labensundu, eleAfrica ananza ilanga leli njengesibonelo sosuku olwasungulwa inhlanganiso yomanyano oweOrganisation of African Unity-OAU, ngomnyaka ka1963, eseyaguquka yaba yiAfrica Union-AU. Indikimba yokunanzwa kwaleli langa lonyaka ithi: “Arts, Culture And Heritage: Levers for Building the Africa We Want”.

Ingcwethi ezicubungula ezombusazwe zithi injongo yokubunjwa kwale inhlanganiso yokumelana loncindezelo lwabamhlophe ngamazwe abensundu lokhu ingakafezwa ngoba ukuphuma kombuso wabahuquluzi benotho ababevela emazweni aphetsheya, kuleli zwekazi, kwadedela imbuso yoncindezelo lwabensundu bencindezela lokubusa ngocuku abanye babo abensundu, bengananzi ilungelo loluntu besutha bona labangane babo lezihlobo abantu makhaza behlupheka.

Udaba lokunanzwa kweAfrica Day siluphiwa nguAnnahstacia Ndlovu
please wait

No media source currently available

0:00 0:04:46 0:00
XS
SM
MD
LG