amalinks wokungena

Breaking News

U-Chin'ono Ubotshelwe Icala Elingekho Emthethweni weZimbabwe Kutsho Amagqwetha Akhe


Intathelizindaba uHopewell Chin'ono

Intathelizindaba elodumo uHopewell Chin’ono obotshwe ngolweSihlanu olwedluleyo, umiswe phambi komthethwandaba kaMantshi eHarare, ngoMvulo.

Igqwetha lakhe uMnu Moses Nkomo uthi ukubotshwa kwakhe akukho emthwethweni ngoba umthetho osetshenziswe ukumbopha wakhitshwa lidale leConstitutional Court.

UChin’ono umiswe phambi komthethwandaba kaMantshi Lazini Ncube we Harare esetheswa icala lokuqamba amanga ngemva kokusabalalisa udaba losane olubikwa lutshaywa ngenduku lwafa lusemhlana kanina, okuphikwa ngamapholisa ethi akula sehlakalo esinjalo.

Iqgwetha lakhe uMnu Moses Nkomo uthi baphikisana lalokhu ngoba kakula sizatho sokubotshwa kwakhe ngaloludaba.

“UChin’ono emiswa phambi kwedale ngoMgqibelo, sasingavumelani lokubotshwa kwakhe ngoba wabotshwa ngomthetho ongekhoyo. Umthetho abamthonisa ngawo wakhitshwa lidale le Constitutional court ngo2014. Kawukho lumthetho yikho esikutshele idale”

Umtshutshisi uNkosazana Nancy Chandakaona yena uphendule esithi umthetho lo wakhitshwa kusetshenziswa isisekelo sombuso esakudala hatshi ealotshwa ngo2013 ngakhoke uthi kusemthethweni ukubotshwa kuka Chin’ono.

Kodwa uNkomo uthe imithetho yonke eyakhitshwa phansi kwesisekelo sakudala kasisebenzi kusisekeelo esitsha esabekwa ngo 2013 esithi kumele uhulumende ame ukuhlukumeza abantu abamphikisayo esebenzisa imithetho yakudala.

UNkomo uthe ukuhlukunyezwa kuka Chin’ono kubonakala ngendlela aphethwe ngayo ejele lokufakwa akwenziwa izankosi ezandleni lenyaweni yena engela cala elezinga laphezulu elingaba yingozi kwezomvikela welizwe loba ukubulala umuntu.

“Kalacal elikhulu. Asifuni kukhuluma ngendlela abenza ngayo, kodwa ngokubona kwami yikuthaba kakhulu kwalabo abasebenza emajele”

UNkomo ubeke isicelo phambi kukaMantshi esokuba uChin’ono ehlukaniswe lezinye izibotshwa njalo aphiwe amanzi akhudumalayo ngoba ecatshangelwa ukuba engabe elomkhuhlane we Covid-19 ngemva kokuhlangana labantu ababili abalalumkhuhlane engakabotshwa.

Kuthi ummeli we Zengeza West uMnu Job Sikhala owetheswa icala elifana lelika Chin’ono, umiswe emthethwandaba ka Mantshi uMnu Ngoni Nduna kodwa uyalilandula leli cala.

Iqgwetha lakhe uMnu Jeremia Bamu uthi uSikhala uhlukumezelwa ukuba waba lesibindi sokufuna ukumela uChin’ono ngaphambilini kokubotshwa kwakhe ngoLwesihlanu weviki edluleyo.

“Sitshele idale ukuba siyakhonona ngendlela abotshwe ngayo. Sibona angani uhlutshelwa ukuba ufuna ukumela uHopewell Chinono. Idale lithi lizakuzwisisa ngodaba lolu kusasa”

UChin’ono loSikhala babotshwe ngemvakokuloba enkundleni yokuxhumana eyeTwitter besola ukutshaywa ngenduku kosane olulenyanga ezithobamunwemunye yokuzalwa, obelusemhlana kanina okubikwa kwenziwa ngelinye ipholisa. Kodwa isikhulumeli samapholisa uMnu. Paul Nyathi, wethule umbiko othi lumntwana akabulawanga uyaphila okwenze amapholisa acine esebopha uChin’ono loSikhala esithi balobe amanga.

Kunjalonje isikhulumeli se MDC Alliance uNkosazana Fadzai Mahere ulobe ekhasini lakhe leTwitter esazisa ngokubotshwa kakhe namhlanje laye esetheswa icala elifana lababili laba. UMahere ukhangelelwe ukumiswa phambi komthethwandaba ngoLwesibili.

Facebook Forum

XS
SM
MD
LG