amalinks wokungena

Breaking News

U-Chinamasa Usolwa Ngokuthi abeZANU PF Bazatshaya Abazatshengisela Mhlaka 31 Ntulikazi


Umnumzana Patrick Chinamasa isikhulumeli seZanu PF

Ingcwethi ezicubungula ezombusazwe, abamandla amaphikisayo lozulu we Zimbabwe, bethuswa kakhulu ngamazwi ethulwe ngu Mnu Patrick Chinamasa, isikhulumeli seZANU PF, awokuthi amalunga ebandla lakhe akasoze agoqe izandla kudalwa umonakalo elizweni esithi ozakalokothe angene ezithaladeni etshengisela ngoLwesihlanu, uzabhaxhabulwa kakubi.

UChinamasa uthi abafuna ukutshengisela bajonge ukukhipha uMongameli Emmerson Mnangagwa esikhundleni ngakhoke abasekeli be ZANU PF bazasebenzisa loba yiphi indlela ukuvimba abasekeli bamabandla aphikisayo anjenge MDC Alliance, abeCrisis in Zimbabwe Coalition labe Zimbabwe Congress of Trade Unions (ZCTU), abasetshenziswa ngamazwe angentshonalanga. Uphinde wathi bazaxotsha ummeli we Melika eZimbabwe, uMnu Brian Nichols.

Unobhala jikelele womanyano wamabandla ezinkonzo owe Zimbabwe Council of Churches (ZCC), uRev Kenneth Mtata uthi kuyethusa okukhulunywa yiZANU PF.

“Sizwile amazwi aphuma kusikhulumeli sebandla le ZANU PF ekhuluma ngodaba lokutshengisela mhlaka 31 July esithi uzasebenzisa udlakela ukulwa lalabo abazabe betshengisela. ayesabisa amazwi lawa uma usithi amabandla aphikisayo ngama terrorists”

Uqhubeke ethi kuyadanisa ukuba uChinamasa ulwisa ummeli we Melika kuleli uMnu Brian Nichols esithi lokhu kwenza imizamo yokukhumisana umlotha phakathi kwele Zimbabwe lele Melika ibe nzima.

“Ma sikhuluma ngamazwi angelayo inhlonipho ekhuluma ngama ambassadora amanye amazwe, lokhu kuyasikhipha isithunzi selizwe. Kuyethiswa uma abaholi belizwe bekhuluma amazwi angaka. Siyakholwa ukuba uMongameli uzawaphikisa lawa mazwi”

Okugcizilelwe ngu Mnu Iphithule Maphosa isikhulumeli sebandla leZAPU yena othi kuqakathekile ukuthi iZANU PF njengebandla elibusayo lilungisise okuhlupha abantu ingasebenzisi udlakela.

“Okumele sikutsho kuhulumende we ZANU PF, yikuthi udlakela aluncedi njalo aluwakhi umuzi. Okuqakathekileyo yikuthi belalele izikhalazo zabantu bebekazi ukuthi kungani abantu befuna ukuthi kungani abantu betshengisela kulo kuthi behlukumeze abantu”

Isikhulumeli sabababilisi bemaphandleni uMnu Nation Mudzitirwa uthi okutshiwo ngu Chinamasa kulakho ukufaka abantu be ZImbabwe ulaka olumangalisayo.

“Lokhu okutshiwo ngu Chinasama yibugebenga ngoba abantu be Zimbabwe bazabambana ukuthi bazatshengisela ngokuthula. Hatshi njengamabandla. Ufuna ukuba abantu batshayane kuchitheke igazi kube lempi”

Kodwa ingcitshi kwezombusazwe uMnu Mlungisi Dube uthi kulilungelo likazulu ukutshengisela.

“Nxa esitsho njalo kuyasimangalisa. Nxa besithi balwelwa impi yenkululeko. Engikutshoyo yikuba abantu be Zimbabwe labo abalambayo bezihawulela kasibambaneni izandla zitshengiseleni silwe lenkohlakalo ekhona elizweni”

Asenelisanga ukukhuluma lommeli weMelika eZimbabwe ukuze sizwe icele lakhe ngaloludaba kodwa hulumende weMelika ubikwa esebize ummeli weZimbabwe eWashington ukuthi azechasisa ngamazwi kaChinamasa la.

Ngeviki edluleyo amapholisa abophe intathelizindaba uHopewell Chingono, lo mkhokheli webandla le Transform Zimbabwe besetheswa umlandu wokufuna ukugenqula uhulumende ngokutshotshozela abantu ukuba batshengisele ekupheleni kuka Ntulikazi. Izolo amapholisa ekhiphe amabizo afana laboMnu Job Sikhala, Gift Ostallos Siziba, Obert Masaraure, Allan Moyo okhokhela izifundi ze ZINASU, Denford Ngadziore labanye esithi kumele baye emapholiseno bayebuzisiswa ngokutshengisela lokhu.

UHulumende uthi ukutshengisela lokhu yindlela esetshenziswa ngamazwe athuthukileyo afana laboBhilithani, iMelika lamanye emizameni yokukhipha uhulumende owakhethwa ngabantu kodwa abamabandla aphikisayo lozulu jikelele uthi ukutshengisela lokhu kujonge ukuveza ukukhonona kwabantu ngokonokala kwesimo somnotho elizweni kubangelwa yinkohlakalo.

Facebook Forum

XS
SM
MD
LG