amalinks wokungena

Breaking News

Ualisile Umncintiswano Wenguqu weWafa Wafa kuZifa Southern Region Division One


Soccer Ball

Asesukelene amaqembu omdlalo wenguqu esigabeni seZifa Southern Region Division One lapho anqikilana khona kumncintiswano weWafa Wafa

Umncintiswano we Wafa Wafa uqale ngoMgqibelo owedluleyo lapho iqembu le Ajax Hotspurs elinqobe khona ele Zimbabwe Saints nge 3 ka nya, ele Mosi Rovers litshaywe ngele Hwange nge 3 ka nya, Indlovu Iyanyathela inqobe ele Mountain Climbers nge 2 ka nya, ele Makhandeni Pirates linqobe ele Quality nge 5 ka 3 ngemva kokutshaywa kwembekwa njengoba isikhathi besiphele zingutshiki lobhanqa 1 ka 1, ele Casmyn lalo linqobe ele Mainline nge 5 ka 4 ngemva kwembekwa njengoba isikhathi besiphele zingutshiki lobhanqa 1 ka 1.

NgeSonto iqembu le Arenel linqobe ele Talen Vision nge 1 ka nya kuthi ele Bosso 90 linqobe ele Ratanang nge 3 ka 2 ngemva kwembekwa.

Isikhathi besiphele zingutshiki lobhanqa 3 ka 3.

Iqembu le Ratanang liqeqetshwa ngababengabadlali beqembu le Highlanders uInnocent Mapuranga kanye lo Chipo Tsodzo.

Abafana be Bosso 90 bayenelise ukunqoba loba nje kulesikhathi lapho abakade benqotshwa khona 3 ka 1 kodwa njalo umsekeli kamqeqetshi weqembu leli uSiza Khoza uthi lesi yisibonelo esokuba ngabafana abasakhulayo.

“Senelisile ukuba sivuke khwatshu ngemva kokuba sizithole sidliwa nge 3 ka 1 njalo abafana batshengise ukuba lesibindi. Ngabafana abancane abasafunda njalo khona bezafunda okunengi,” kutsho uKhoza.

Iqembu le ZPC Hwange lona lidlulele kusigaba esilandelayo esomncintiswano lingazange likhahlele ibhola njengoba lelo obekumele lidlale lalo ele Binga Pirates lingenelisanga ukuya edolobheni leHwange lapho obekumele lumdlalo udlalelwe khona.

Kolunye udaba olumayelana lomdlalo wenguqu kube lomdlalo owodwa kusigaba se Castle Lager Premier Soccer League ngempelaviki eyedluleyo ngemva kokuba eminye imidlalo yedluliselwe phambili ngoba kulabadlali lenkokheli zamaqembu abatholakale belomkhuhlane we Covid – 19.

Lumdlalo ngobuphakathi kweqembu le Ngezi Platinum Stars kanye lele Herentals wona ofike emaphethelweni ele Ngezi linqobe nge 3 ka nya.

Limpumela itshiye iqembu le Ngezi lihlezi phezu kwengalane lilemiklomelo eyisikhombisa ngemva kwemidlalo emithathu.

Imidlalo eyithoba minwe mbili eyeviki lesithathu elomncintiswano we PSL yedluliselwe phambili ngempela viki eyedluleyo.

Isiphathamandla seqembu le Highlanders uRonald Moyo, uthi iqembu le Bosso alikho esimeni esibi.

“Ngakwelethu icele bekulabadlali abangaba babili abakade bengazilolongi labanye ngeviki eyedluleyo kodwa okwakhathesi siyazilolonga njengenhlalayenza njalo singadlala nxa kungathiwa sidlale ngempelaviki ezayo,” kutsho uMoyo.

Umthetho uthi iqembu lingatholakala lilamalunga alo ayisikhombisa alomkhuhlane we Covid – 19 kalivunyelwa ukudlala.

Facebook Forum

XS
SM
MD
LG