Solugqhitshiwe ukhetho lwama primaries ezigabeni ezisempumalanga yakwele Melika okuvotwa kuma-primaries okudinga ozamela ibandla lama Democrats lelama Republicas kukhetho olukhulu oluzaqhutshwa ngoLwezi lonyaka.
Luqhubekela phambili kwezinye izigaba ukhetho lolu olubizwa ngosuku lolu ngokuthi yiSuper Tuesday. Ama primaries la aqhutshwa eVirginia, North Carolina, Vermont, Maine, Oklahama, Arkansas, Oklahama, Iowa, Alaska, Colorado, Utah, Minnesota, Massachusetts, Texas, Carlifornia leSamoa.
Kubikwa ukuba owayengumnongameli uMnu. Donald Trump usenqobe kuma primaries ezabelweni ezinengi kakhulu kukhetho lolu lweSuper Tuesday. Uselabantu ababizwa ngokuthi ngama delegates ezabelweni ezitshiyeyo abedlula amakhulu amane lengxenye – 418 kuthi ancintisana laye uNkosikazi Nikkie Haley ulangamatshumi amane lasithupha – 46.
Kukhangelelwe ukuba uTrump uzathola amavoti amanengi kukhetho lolu.
Kubandla lama Democrats uMongameli Joseph Biden uyakhokhela ngenani lama delegates okwamanje kulandela ukuqala kwama primaries lonyaka azaqhubekela phambili kuze kutholakale ozancintisa kukhetho olukhulu ngoLwezi. Abaphuma kukhetho lwama primaries kubandla leli uMnu. Ron Desantis loMnu. Vivek Ramaswamy balama delagates afika itshumi lambili – 12 bobabili.
Okwamanje kubandla lama Democrats, uBiden ulama delegates angakhulu ayisithupha lasithupha – 609 abanye abakukhetho lolu balamalutshwana kakhulu kukhetho lolu.
UTrump loBiden bakhangelelwe ukuba lama delagates amanengi kusisihlwa ngoLwesibili njalo langoLwesithathu sokubalwe amavoti ezabelweni ezisentshonalanga zonke lezinye.
Kodwa lapho iStudio 7 eyethekelele khona bebalutshwana abantu abavote kukhetho lolu eVirginia.
Kulabantu abedlula kancane amakhulu amabili lengxenye - 250 abavote kusukela ekuseni kusiyafika emini yantambama ePrecinct 146 edolobheni leArlington esabelweni seVirginia.
Kodwa kulezinye izigaba okubikwa ukuba banengi abavote kukhetho lolu esabelweni lesi.
Ababona ngokuqhutshwa kokhetho lolu ePrecint 146 batshele iStudio 7 ukuthi kube labantu abalutshwana kakhulu lonyaka kuma primaries la endaweni le uma kuqathaniswa leyinye iminyaka.
UNkosikazi Stephanie Sanders ophethe isigaba sePrecint uthe, "Lathi kasizazi izizatho ezenze kwaba labantu abavotayo namuhla. Kujayele ukuba labantu abanengi ngesikhathi sokhetho. Kuyasimangalisa lokhu."
Uthe kuzathatha isikhatshana ukuthi yethulelwe uzulu impumela yokhetho lolu esabelweni lesi njengenhlalayenza.
Omunye wabavote kukhetho lolu nguMnu. James North othi seleminyaka engamatshumi amathathu evota esigabeni lesi.
Uthi, “Sifuna ukuvimba okungenzakala kukhetho oluzaqhutshwa ngoLwezi ngoba kulakho ukungena umuntu ongabhidliza eleMelika. Kasifuni ukubuyela esikhathini sokwenzakala kwele Germany kuma 1930s okwakuloncindezelo olunzima. Sifuna ukuzi busa eMelika hatshi ukudonswa ngamakhala lokufuna ukuba lombuso wocuku.”
Omunye njalo nguMnu. Shaun Howard othi abatsha bonke kumele bevote kukhetho lolu ngoba uBiden wethule inhlelo zikazulu ezigoqela ukwakhiwa kwemigwaqo lokunye.
Ovota kwele Raphael Riveria umsekeli webandla lama Republicans uthi uvotele uHaley ngoba ugcono kulo Trump. Uthi uTrump enganqoba kukhetho lolu uzavotela uBiden ngoba uTrump wona kakhulu kwele Melika esisikhundleni sika mongameli.
Uthi okuhlupha ngoBiden yikuthi usekhulile njalo kazethuli kahle ebantwini kukhetho lolu.
Forum