UMongameli weMelika uMnu Donald Trump uthi uzimisele ukusuka esihlalweni nxa enganqotshwa nguMnu Joe Biden kodwa uthi ukhetho lolu kumele luqhutshwe ngendlela esuthisayo kungela kudlelezela.
Esikhathini esedluleyo uTrump ubengawuphenduli ngendlela ecacayo lumbuzo, okubangele ukuthi abanye bacabangele ukuthi ulakho ukwala ukusuka embusweni enganqotshwa.
UTrump loBiden baqhube limihlangano ye-town hall labantu abazavota behlukele lapho abaphendule khona imibuzo izolo yabantu laba njalo bethembisa abazakwenzela uzulu benganqoba kukhetho oluzakwenziwa mhlaka 3 ngoLwezi.
Lolukhetho solusalelwe ngamalanga alitshumi lasikhombisa kuphela ukuthi lwenziwe.
Ekhuluma kowakhe umhlangano, uTrump usole uBiden esithi abantu akumelanga bamvotele ngoba engasoze enelise ukutholisa abantu imisebenzi lokukhulisa umnotho.
Ubuzwe njalo ngokubanjwa ngumkhuhlane weCovid-19 wathi kwenzakala nje ukuthi umhlasele kodwa uyawathatha amanyathelo okuzivikela.
Kodwa uthe banengi abantu abazivikela ngokugqoka ama-mask kodwa abahlaselwa yilumkhuhlane.
“Kwenzakala ngawubamba lumkhuhlane kodwa angila nkinga lemask, ngitshela abantu ukuthi bayigqoke. Kodwa kulembuko ephumileyo ekhomba ukuthi abantu abagqoka ama-mask abayisilinganiso se85 percent bayawubamba lumkhuhlane,” kutsho uTrump etshela intathelizindaba yeNBC ebilawula umhlangano wakhe lozulu.
“Angisoze ngihlale ngicatshile kubasement, kumele ngihlangane labantu ngoba nginguMongameli. Bayawubamba lumkhuhlane abantu abagqoka ama-mask, khangela uGovernor weVirginia.”
UMnu Biden laye uchothoze uTrump kowakhe umhlangano obulawulwa yintathelizindaba yomsakazo weABC, esithi abantu akumelanga bevotele uTrump ngoba esetshengisile ngendlela aphathe ngayo udaba lweCovid-19 ukuthi kakwazi akwenzayo.
“Wadlalisa ithuba lokulwisa lumkhuhlane etshona etshela abantu izinto ezingaqondanga esithi umkhuhlane lo uzaphela ngeEaster, wathi njalo nxa sokutshisa uzanyamamalala njengamasalamusi,” kutsho uMnu Biden.
“Ulokhu esitsho njalo lakhathesi. Okumele sibe sikwenza yikuthi sidonse kanyekanye njengelizwe. Kodwa yena uthi ngumlandu wabosibalukhulu bezabelo ukukhokhela imizamo yokulwisa lumkhuhlane. Ngumlandu kaMongameli ukukhokhela, kodwa yena kakwenzanga lokho.”
Ngenxa yohlelo oluvumela abantu ukuvota ngaphambilini kwelanga lokhetho, kulabantu abayizigidi phose ezimbili, 17 million asebevotile.
Isizalwane seZimbabwe esihlala eTexas, eMelika, uMnu Garry Thwala Jackson utshele iStudio 7 ukuthi lokhu kuveza ukuthi inengi lilomdlandla wokuvota kulolukhetho.