UMongameli weMelika, uMnu Joe Biden, sekhuthaze amalunga ephalamende ukuthi epasise isikhwama sakhe seUS$2 trillion, esibizwa ngokuthi yiBuild Back Better, sona esijonge ukuphehla umnotho ngokuphathisa abaswelayo kanye lokulwisana lokuguquka komkhathi.
Kumbiko awethule kuTwitter izolo, uBiden uthe eleMelika lilizwe elilamathuba anaphakade, njalo uthe lawo mathuba afezwa ngamaphupho abanzi afana lesikhwama lesi.
Ngokunjalo, uthe kubalulekile ukuthi amalunga edale lephalamende laphezulu, iSenate, apasise lesisikhwama.
Iphalamende yaphansi, iLower House seyasipasisa kwasala iSenate lapho osokulobunzima ngoba elinye ilunga lebandla likaBiden, uSenator Joe Manchin, esala ukuthi isikhwama lesi sipasiswe sikusimo esikuso.
Uthi kunengi okumele kuguqulwe. AmaDemocrats ebekhangelele ukupasisa lesisikhwama lonyaka, kodwa inkokheli yalelibandla isivuma ukuthi ayisoze ikwenelise lokhu.
Ohlaziya ezombusazwe njalo esekela amaDemocrats uMnu Den Moyo uthi lokhu kufaka uBiden lamaDemocrats esimeni esibi phambilini kokhetho lwephalamende oluzakwenziwa ngomnyaka ozayo.
