Omele ibandla eliphikisayo elamaDemocrats kukhetho lokudinga uMongameli weMelika uMnu Joe Biden ulokhe ekhokhela ngamavoti amanengi njalo uthi sokusobala ukuthi uzanqoba.
Kodwa ancintisana laye uMongameli Donald Trump usecele umthethwandaba ukuthi ungenele ngoba esithi uBiden lebandla lakhe bayaqilibezela ekubalweni kwamavoti.
Ukuze umuntu anqobe kukhetho lolu kumele athole amavoti ezabelo angamakhulu amabili alamatshumi ayisikhombisa, 270, college votes.
Okwamanje uBiden usethole angu253 kuthi uTrump yena ulangu213.
Izabelo ezilamavoti alokhe ebalwa zigoqela iAlaska, Arizona, Nevada, Pennsylvania, North Carolina leGeorgia.
“Ngemva kokubalwa kwamavoti ubusuku bonke, sokusobala ukuthi sinqobe ezabelweni ezinengi, okuzakwenza senelise ukuthola ama-electoral college votes angu270 adingakalayo ukuthi umuntu anqobe kukhetho lukaMongameli,” kutsho uMnu Biden ekhuluma kumabonakude izolo.
“Angitsho ukuthi sesinqobile, kodwa ngithi nxa amavoti wonke esebaliwe, ngiyathemba mpela ukuthi sizanqoba…Sokuzaphela ukubalwa kwamavoti; ngizwa ngijabulile.”
Amagqwetha kaTrump wona acele umthethwandaba ukuthi ungenele endaweni ezifana leMichigan, iPennsylvania, leGorgia ukuze kuvunyelwe abantu bakhe babekhona nxa kubalwa amavoti, ikakhulu lawo athunyelwa ngeposo.
Lanxa uTrump engazange aphume kumabonakude njengoBiden izolo, wethule owakhe umbiko enkundleni yeTwitter ekhonona ngalolukhetho.
Uthe lanxa amagqwetha akhe esecele inkantolo ukuthi ingenele, umonakalo usudalekile.
“Lokhu yikuntshotshelwa kukazulu weMelika. Yinto eyangisa ilizwe lethu. Besizimisele ukunqoba kulolukhetho. Eqinisweni, sinqobile,” kutsho uTrump ekhuluma ngosuku lokhetho.
“Umlandu wethu khathesi ngowokuvikela impumela yokhetho. Yikuntshontshwa kokhetho okukhulu elizweni lethu lokhu. Sifuna umthetho usetshenziswe ngendlela. Sesisiya emthethwandaba weSupreme Court, sifuna kumiswe ukuvota.”
Ukuhlaziya loludaba sixoxe losopolitiki weZimbabwe ohlala eMelika uMnu Tim Muringai yena othi lanxa uTrump esehambe emthethwandaba, kaboni lokho kuguqula impumela yalolukhetho.
EleMelika lilizwe elibukwa ngamazwe amanengi emhlabeni jikelele kundaba zombuso okhululekileyo langendlela eliqhuba ngayo ukhetho.
Lanxa kunjalo, umqoqi wenhlelo zebandla leMDC-T uMnu Abednico Bhebhe uthi kube lokudlephana lokufuthelana okukhulu kulolukhetho.