UMongameli weMelika uMnu Joe Biden ukhulume lomkhokheli weleRussia uMnu Vladimir Putin okwamahola amabili ngoLwesibili wamxwayisa ukuthi engalokothi athumele amabutho akhe ukuyangena ngodlame kweleUkraine.
Umbiko owethulwe yisigodlo seWhite House uthi uBiden wazise uPutin ukuthi engavele enze lokho, eleMelika labangane balo bazakwethesa eleRussia izijeziso zenotho baphinde balithathele amanye amanyathelo angavezwanga sobala.
Ukukhulumisana phakathi kwababili laba kuza ngesikhathi kulembiko ethi uPutin uqoqa ukuthumela ababutho akhe ukuyahluthuna eleUkraine alenze ingxenye yeRussia.
Umsakazo wakweleRussia oweRT ubike ukuthi uMongameli Putin yena utshele uBiden ukuthi kafuni umanyano wamabutho eNATO uthumele izikhali emazweni angcelelane lelizwe lakhe afana layo iUkraine.
Abanye bathi iMelika leRussia engacina ethwalelana izikhali.
Kodwa ingcwethi kwezombusazwe uMnu Effie Dlela Ncube utshele iStudio 7 ukuthi kaboni lokhu kusenzeka ngoba amazwe womabili esazi mhlophe ukuthi engalwisana kungatshabalala yonke into kubhubhe lomhlaba sibi sawo.
