amalinks wokungena

Breaking News

UBiti Labanye AbabekuPDP Sebexotshwa eDale lePhalamende


MDC Alliance Vice President Tendai Biti

Idale le phalamende libika ukuba unobhala webandla eliphikisayo ele PDP elikhokhelwa nguNkosikazi Lucia Matibenga, lazise ukuba, uMnu Tendai Biti labanye bakhe abaphuma kuleli bandla sebezaxotshwa kuleli dale.

Umlawuli wedale lephalamende uMnu Jacob Mudenda uthi wamukele umbiko ovele kunobhala webandla lePeople’s Democratic Party (PDP) uMnu Benjamin Rukanda emazisa ukuba ibandla lakhe lithi akaxotshwe amalunga lawa.

“Umhlonitshwa uTendai Biti owe Harare East, uWillias Madzimure owe Kambuzuma, USettlement Chikwinya owe Mbizo, uKucaca Phulu owe Nkulumane, uNkosikazi Sichelesile Mahlaangu owe Pumula lo Mnu Regai Tsunga owe Mutasa South, simelele impendulo yephalamende yimi uRukanda”

U-Mudenda akasatshongo ukuba abayisitshiyangalombili laba sebehle bamiswa ukuza edale kusukisela namuhla. Lokhu kulandela ukuxotshwa ngandlela yinye, kwamanye amalunga aleli dale ngomnyaka odluleyo, aweMDC Alliance ngabe MDC T esikhokhelwa nguMnu Douglas Mwonzora.

Isikhulumeli sePDP, uMnu Nqobizitha Khumalo uthi amalunga lawa asexotshiswa edale ngoba engasalandeli iziqondiso ze bandla.

“Kumnyaka ophelileyo sibe lomhlangamngo sathi sifuna ukuba sixotshe amakhansili labammeli bephalamdende sathi sifuna ukuba sixotshe lawa ma MP sisebenzisa isisekelo sombuso webandla lethu. Isisekelo sithi nxa ilunga lingatshiya umhlangano wethu aye komunye siyaxotsha”

Kodwa amalunga asexotshiswa edale yiPDP athi ibandla leli kalilamandla lungelo lokwenza njalo ngoba angena ephansi komanyano owe MDC Alliance kuthi iPDP ebaxotshileyo ekhokhelwa nguNkosikazi Lucia Matibenga yayikumanyano weRainbow Coalition eyayikhokhelwa nguNkosikazi Joice Mujuru.

Omunye wabaxotshiweyo uMnu Willas Madzimure uthi ibandla labo alilani le PDP ekhokhelwa nguNkosikazi Matibenga.

"Umnu Mudenda uyakwazi ukuba kulodaba olusemadale ukuba kulomuntu othiwa ngu Rukada. Mina uRukanda kangazi lami kalazi ibizo lami"

Ingcitshi ezicubungula ezombusazwe zithi okwenzakala kuBiti labanye bakhe yikungenela kwe ZANU PF abathi ifuna ukubhidliza amabandla aphikisayo. Eyinye yalezi ngcwethi ezilomcabango lo, nguMnu. Pride Mkono.

“Incwadi ebalwe ephalamende ayicacanga ukuba uBiti labanye bakhe baxotshiwe na, kodwa siyakwazi ukuthi ngendlela esibone kusenzakala ngayo kusobala ukuba uBiti labanye bakhe bazaxotsha”

Nxa uBiti, uMadzimure lo Chikwinya bengaxotshwa kuyabe kungokwesibili bexotshwa ephalamende ngemva kokuxotshwa ngomnyaka ka2014 baze babumbe ibandla le MDC Renewal elaliphume kuMDC-T isakhokhelwa ngumuyi uMnu Morgan Tsvangirai, ngomnyaka ka 2014.

Facebook Forum

XS
SM
MD
LG