amalinks wokungena

Breaking News

UBulawayo Uncoma Ukuqheliswa Kwesikhathi seCovid 19 Lockdown Ngamaviki Amabili


Bulawayo City

Izakhamizi zakoBulawayo zamukele ngenjabulo ukungezelelwa ngamaviki amabili kweziqondiso zeLockdown.

Abantu bathi leli linyathelo elihle ngoba umkhuhlane usudale umonakalo omkhulu elizweni kodwa bacela uhulumende ukuba aqhubeke eyekethisa ezinye zeziqondiso zelockdown ukuze benelise ukuziphilisa.

Isakhamuzi sakoBulawayo uMnu Nkululeko Nyathi uthi akalankinga laleli nyathelo.

“Ukwengezwa kwelockdown angilankinga lakho njengoba sekulomuthi ovele eChina ozosiza ukuze babone ukuba umuthi usebenza njani ngoba umkhuhlane sisaselawo sisadinga njalo ukuba silwisane lawo sisasempini. Njengeoba evule mbijana kungabakuhle uma engaqhubeka elokhe evula mbijana mbijana njalo okwengezwa kwamalanga elockdown kubalulekile.”

Esinye njalo isakhamuzi sakoBulawayo uNkosazana Sisasenkosi Ndlovu yena ukubona kukuhle kodwa ufuna ulwazi olucacileyo ngejekiseni lokuvikela umkhuhlane eleCovid-19 vaccine.

“Ukungezelelwa kwelockdown kulicebo elihle lobanje engananzeleli ukuphatheka kwabantu asebelahlekelwe yimisebenzi. Ukwengeza isikhathi akusoke kuqede iCovid, njalo umuthi ozahlatshwa uzulu kumele uhlelo lwakhona lubaluleke hatshi ukuthi kucine kuhlatshwana ngobungane.”

Umqondisi wenhlanganiso yabaphila ngokuthengisa eyeBulawayo Vendors and Traders Association, uMnu Michael Ndiweni uthi bona bajabulela ukuyekethiswa kweziqondiso ezibavumela ukuthi basebenze.

“Siyasamukela isinqumo sikahulumende sokwengeza amalanga eziqondiso zelockdown lokuba imikambo ivulwe kulandela iziqondiso zeWHO. Lathi sesithe saphuma ijumo kulandela lesisiqondiso ukuba sincedise amalunga ethu avule imikambo silandela iziqondiso zeWHO ngoba inengi labo lokhe livalelwe kusukela kukhefu lekhisimusi ngakho sizabapha lemithi yokuvikela ukubamba icikwane lokubona ukuba abasondelelani.”

Olwela amalungelo oluntu, uMnu Mbuso Fuzwayo ongumabhalane jikelele weIbhesthu LikaZulu uthi udubo nje yikuthi uhulumende akacaci kunhlelo zokuqeda lolubhubhane.

“Ukungezelelwa kwelockdown angikuboni kuyinto embi kumbe esizayo ngoba abantu bayadubeka abalalutho lohulumende kakacaci ukuthi ivaccine iyasebenza njani ukuqhubeka abantu bevalelwe akudali bahluko okuqakathekileyo yikuthi uhulumende atsho ukuthi uhlupho lolu lulungiswa njani sisiyaphambili. Ukwengeza lokungezwa kungakabi lesolution kusabuya umuthi weChina abezempilakahle bengakaqedisisi ngawo akusisizi ngalutho.”

Izolo uMongameli Emmerson Dambudzo Mnangagwa kunkulumo yakhe ayethulele isizwe wengeze ngamaviki amabili iziqondiso zelockdown. Embikweni munue uyekethisa amahola okuvimba ukuhamba hamba kwabantu, esecurfew. Abamabhizimusi lemikambo kazulu bayekethiselwe imigoqo kodwa batshelwa ukuba bamele balandele iziqondiso zenhlanganiso yomanyano wamazwe womhlaba ebona ngezempilakahle eyeWorld Health Organization, zokuvikela ukumemetheka kweCOVID-19.

Udaba lokwengezwa kwesikhathi seCovid 19 lockdown siluphiwa nguAnnahstacia Ndlovu
please wait

No media source currently available

0:00 0:04:22 0:00

Facebook Forum

XS
SM
MD
LG