amalinks wokungena

Breaking News

UBulawayo Wale Ukwamukela iBudget kaManisiphala eka2022


Bulawayo-city-council.
Bulawayo-city-council.

Abenhlanganiso elwela amalungelo oluntu eye Women Institute of Leadership Development leyezakhamizi eyeBulawayo Progressive Residents Association bahlangene lamhlanje eBulawayo Club behlaziya uluhlu lwendleko kamanisiphala walelo dolobho, I Budget yomnyaka ka2022.

Izakhamizi zakoBulawayo ziyalile ukwamukela iBudget kamanisiphala yomyaka ozayo, zisithi ukuqansa kwesilinganiso senhlawulo yemithelo ngamakhulu edlula amabili ekhulwini-216%, sikhulu kakhulu njalo inengi labo kaliyenelisi ngoba iholo lalo liphansi kakhulu kwabalutshwana abaqatshiweyo abanye bengabazisebenzayo.

Isakhamuzi sakoBulawayo ohlaziya ngezomnotho, uMnu Ntokozo Tshuma uthi ukhansili kazame elinye icebo ukubuthanisa imali.

“Kuhle ukuthi limali ikhansili akhangelele ukuba ibhadalwe bayichithe ngezigaba ngoba ilakho ukuhlukuluza izakhamuzi ngoba kungakhama abantu abanengi.”

Umgcinisihlalo weBulawayo Progressive Residents Association, uMnu Ambrose Sibindi uthi uzulu kazange afake imibono yakhe kubudget ka2022.

“Sinanzelele ukuba ayisibo bonke edolobheni abaphatheke kubudget ka2022 yedolobho ngakho sesidinge ingcwethi ukuba zingenele zincedisane lamakhansila ekucubunguleni leli budget ukuze intuthuko iqhubekele phambili edolobheni.”

Isakhamuzi sakoBulawayo uKhethiwe Tshuma uthi ibudget ka2022 bayalile njengezakhamizi.

“Thina njengezakhamizi ibudget ka2022 yekhansili siyalile ngoba abazange basitshele ukuthi ibudget ka2021 isebenze njani buye njalo le eka2022 iqansa nge 216 percent imali enengi kakhulu ezakhama izakhamizi ngoba bebevele besehlulwa yikukhuphuka kwemali ka2021”

Esinye isakhamuzi sakoBulawayo esihlala kuWard 5 uNkosazana Sarudzai Nyandoro uthi bajikelwe ibudget.

“Akula muntu okwaziyo ukuthi ibudget yethu iyangaphi iqala ngaphi, umuntu wonke ulwisana layo akulatransperancy akukhanyi ukuthi imali zisebenza njani ukuthi iqalaphi iyaphi wonke umuntu ukhathazekile.”

Ukhansila kaWard 17 emele loWard 19 uNkosikazi Sikhululekile Moyo uthi ibudget ibuye kwangabi lokuzwanana phakathi kwamakhansila lenkokheli zekhansili.

“lsikhathi sokukhangela lokulungisisa ibudget sithe sifika kwabalokungazwani phakathi kwamakhansila lemanagement yekhansili ngoba kulokuthi siqale sihlale njengamakhansila sikhangele ibudget ingakayi kuzakhamizi labanye abaphathi bedolobho ihle yajikelwa uzulu siyibone isikumawhatsapp okuyinto esiyisole kakhulu ngoba simele izakhamizi, uzulu kayamukelanga kodwa libudget iqakathekile sikhangelele ukuba kusasa imanagement yekhansili ingaliphindi leliphutha.”

Umsekeli kaMayor wakoBulawayo, uKhansila Mlandu Ncube obekhona emhlanganweni lo, ucele ukuba izakhamizi ukuba zisebenzisane labokhansila balungisise ibudget le.

“Sithi zakhamizi asibambaneni sithuthukise uBulawayo sibone amakhansila becela abahlaziya ngeze economy ukuthi bayihlaziye ngakho sesizakwenza okutshiwo yizakhamizi lengcitshi ekuphumeni lebudget eyamukelwa ngumuntu wonke.”

I-budget kaBulawayo eyomnyaka ozayo oka2022 iqakathekise umsebenzi wamanzi lapho eyabele khona amadollar edlula iBillion eyodwa-$1,164 billion. Kuhlangothi lwezempilakahle kufakwe amadollar lawo edlula ibillion eyodwa-$1,207 billion. Emsebenzini wokudonswa kwamanzi angcolileyo laphuma ezambuzini, kufakwe izigidi eziphose zifike iBillion-$941,5 million, emsebenzini wezindlu kufakwe izigidi ezedlula amakhulu amane amadollar-$402,6 million.

Umanisiphala wakoBulawayo wethule ibudget ayihlelileyo yomnyaka ka2022 yamadollar angaba ngamabillion angamatshumi amabili lane-$24billion, esolwa yizakhamizi zisithi imithelo yokubhadalela leyo budget kaziyenelisi njalo uyihlele eyedwa engakhulumisananga lozulu njengenhlala yenza.

XS
SM
MD
LG