Umkhokheli webandla leCitizens Coalition for Change, uMnu. Nelson Chamisa, uthi usetshiyele ibandla leli esithi selihluthunwe libandla leZanu PF, elisebenzise ukulibhidliza nguMnu. Sengezo Tshabangu othi ungunobhala jikelele weCCC.
UChamisa owethule umbiko lo namuhla uthi usefuna ukuphendla ezinye indlela zokukhulula eleZimbabwe athi kalisasebenzeli uzulu.
Uthi kuzwisa usizi okwenziwe nguTshabangu labanye bakhe abaxotshisa amalunga eCCC edale lephalamende lamakhansili kwaqhutshwa ukhetho lwama by-elections okwavinjwa amalunga lawa lamakhansili ukuba ancintise.
Okwamanje sekulungiselelwa ukuba kuqhutshwe olunye njalo ukhetho lwama by-elections olokhangelelwe ukuthi luzakwenziwa mhlaka 3 Nhlolanja lonyaka. Sekuvinjwe abanye njalo ababekudale lephalandende lamakhansila ebandla leCCC ukuba bengancintisi kukhetho lolu.
UChamisa uthi kusobala ukuba iCCC isingenwe zimpehlane ezibambisana leZanu PF ngakho-ke sokuyisikhathi sokutshiya ibandla leli. Isikhulumeli sebandla leCCC uMnu. Promise Mkhwanazi ukhuluma kabanzi ngodaba lolu.
Kodwa obona ngokwethulwa kwemibiko kubandla leZanu PF, uMnu. Farai Marapira, uthi uChamisa nguntando kayiphikiswa.
Ilunga lebandla leZAPU, uMnu Mathew Sibanda, usola inyathelo elithethwe nguChamisa esithi isinqumo sakhe asiveli ebantwini ayebamele kukhetho oludluleyo.
Olwela amalungelo oluntu uNkosikazi Cora Ndebele uthi akubamangalisi okwenziwe nguChamisa.
Isikhulumi selinye icele eleCCC elikhokhelwa nguTshabangu, uMnu. Alfred Dzirutwe, uthi uChamisa ligwala elehluleke ukumela abantu.
Akwaziwa ukuba uChamisa uzasungula nini elinye ibandla ngesikhathi kulemibiko ethi amakhansili amanengi koBulawayo aselobele umabhalane omkhulu wedolobho leli esithi asesuka ezikhundleni zabo kulandela okwethulwe ngobekhokhela ibandla leCCC. Kulamalunga edale lephalamende lamakhansila okuthiwa bazakwale ukusuka ezikhundleni besithi bakhethwa nguzulu.
Ukuze sihlaziye udaba lolu, sixoxe loMnu. Pashor Sibanda owaxotshiswa nguTshabangu edale lephalamende nyakenye loMnu. Khaliphani Pugeni omele uTshabangu.
Forum