Umkhokheli weMDC Alliance uMnu Nelson Chamisa uqhubeke ngemihlangano yakhe yokukhankasela ukhetho oluzayo eMatabeleland South ngoMvulo ngemva kokuqhuba uhlelo olufanayo enyakatho yeMandebeleni ngeviki edluleyo.
UChamisa uthi konke lapho aya khona abantu bakhala ngokuthi bafuna utshintsho kundlela ababuswa ngayo. Eloba enkundleni yeTwitter, uChamisa laye uthembisile ukuthi ngempela iyeza iZimbabwe entsha.
NgoMvulo wethekelele indawo ezitshiyeneyo eBulilima laseMangwe njalo uzaqhubeka ehlangana labasekeli bakhe kanye lenkokheli yebandla lakhe eMatabeleland South ngoLwesibili.
Uhlelo lukaChamisa lolu ngolokulungiselela ukhetho lwamaby-elections olukhangelelwe ukwenziwa ngoMbimbitho kumnyaka ozayo kanye lokhetho lwamalunga ephalamende, amakhansila kanye loMongameli oluzakwenziwa ngo2023.
Umgcinisihlalo weMDC Alliance eMatabeland South uMnu Solani Njemnyama Moyo utshele iStudio 7 ukuthi ngempela umbiko uMnu Chamisa awutholayo ebantwini ngowokuthi sokumele angene embusweni aguqule izinto.