Umkhokheli weMDC Alliance uMnu Nelson Chamisa uthi uMongameli Emmerson Mnangagwa kumele etshiyane lodlakela njalo ekele ukusebenzisa amapholisa ukuphazamisa inhlelo zebandla lakhe.
UChamisa wethume amazwi la enkundleni yeTwitter ngoLwesibili kulandela ukutshaywa kwabasekeli bakhe ngabantu abacatshangelwa ukuthi ngamalunga eZanu PF eMasvingo ngoMvulo layizolo.
Ibandla leMDC Alliance lithi abasekeli beZanu PF laba batshaye amafasitela ezimota zamalunga alo ebehamba loChamisa kuthange njalo izolo yena uChamisa uhlukuluzwe ngabasekeli beZanu PF abamhanqe bazama ukumenqabela ukuhlangana lamalunga ebandla lakhe eChiredzi.
Lelibandla lithi amalunga alo aphange amhlenga uChamisa njalo kalimalanga.
UChamisa uthi loba iZanu PF ingaze yenzeni ayisoze imenqabele ukuqhuba inhlelo zakhe zokuletha utshintsho eZimbabwe.
Usikomitshi weZanu PF uMnu Patrick Chinamasa yena utshele intathelizindaba ngoLwesibili ukuthi uMnu Chamisa uhlaselwe ngabasekeli beZanu PF ngoba ubezama ukukhuluma labo bona bengafuni.
Kodwa ngakolunye uhlangothi ukulandule ukuthi yibo abatshaye izimota zeMDC Alliance esithi ibandla leli lizama nje ukungcolisa igama leZanu PF ngoba kulesithunywa seUnited Nations esiza elizweni.
Lawo ngamazwi agcizelelwe lilunga leZanu PF uMnu Joseph Tshuma.
Khepha umsekeli wesikhulumeli seMDC Alliance uMnu Gift Ostalos Siziba uthe bazaqhubeka behlangana lozulu kungelani lokuhlukuluzwa ngamalunga eZanu PF.