Obengumphathintambo wezemali uMnu Ignatias Chombo, yena obotshwe libutho ekugenqulweni kukahulumende kaMnu Robert Muagbe watshaywa kakubi, uzamiswa emthethwandaba namuhla ngoMgqibelo esetheswa icala lobuhuquluzi.
Igqwetha likaChombo uMnu Lovemore Madhuku utshele intathelizindaba ukuthi uChombo ulaliswe esibhedlela ngoLwesine ngemva kokubhaxabulwa ngamasotsha.
UChombo lilunga lecele leZanu PF, eleG40 lona ebelilwisana lelikaMnu Emmerson Mnangagwa eleTeam Lacoste engakabi nguMongameli welizwe.
Amacele womabili ebebanga isikhundla sikaMongameli welizwe ebesiphethwe nguMnu Robert Mugabe, yena ogenqulwe embusweni libutho kwasokungena uMnangagwa.
Amanye amalunga eG40 abikwa edingwa ngamasotsha abalisa obengumphathintambo wezemfundo yaphezulu uMnu Jonathan Moyo, obengumphathintambo wentuthuko yezabelo uMnu Savior Kasukuwere labanye.
Lezi yizo ingqungquthela ebezihamba phambili ekuhlambazeni lekuhlukuluzeni uMnangagwa zincedisana loNkosikazi Grace Mugabe.
Indlu kaMoyo lekaKasukuwere zibikwa zigqekezwe ngamasotsha abanga umonakalo omkhulu. abikwa njalo esethusela imuli zabo.
Ipulazi lendodakazi kaMugabe, uBona lihlaselwe ngabantu abanakanelwa ukuthi ngabakubutho kumbe abasekeli beZanu PF abakucele likaMnangagwa balumathisa izilimo ngomlilo.
Lanxa amabutho esithi abophe uChombo ngoba engesinye sezikliwi ezibangele ukubhidlika komnotho weZimbabwe, inengi lithi kusobala ukuthi ayaphindisela ukuhlukuluzwa kukaMnanagwa ngamalunga eG40.