amalinks wokungena

Breaking News

Uzulu Udaniswa Ludlakela Kubandla leZanu PF Lele MDC-T


Abalandeli bebandla leZanu PF abathakazelela uMongameli Emmerson Mnangagwa.

Annastacia Ndlovu

Kulabantu abahlala koBulawayo bathi lonyaka kulodlakela lokwethuselana kumabandla amakhulu agoqela ele Zanu PF lecele leMDC-T elikhokhelwa nguMnu. Nelson Chamisa.

Ngakho-ke abanengi bathi akumelanga lokhu kucine kusenzakala elizweni lonke jikelele ngesikhathi sokhetho oluzayo.

Ngesikhathi sokhetho kwele Zimbabwe kulabalandeli bebandla leZanu PF abacatshangelwe ukuthi babambisana labanye abantu abakuhulumende webandla leZanu PF ukuthi balwisane labakumabandla anjenge leMDC-T, Zapu lamanye aphikisayo.

Sokwabulawa njalo kwathunjwa abantu abanengi kusukela ngesikhathi ilizwe lithola uzibuse. Abanye lokhe kungaziwa ukuthi bafela ngaphi njalo babulawa ngobani.

Konke lokhu kufakwa ezandleni zebandla elibusayo eleZanu PF.

Okwamanje kukhanya engani udlakela lokhetho luphakathi kwamalunga ebandla leZanu PF lawe MDC-T ekhokhelwa nguChamisa.

Bayalwisana bodwa kumabandla la kubangwa izikhundla labazawamela kukhetho oluzayo.

Banengi abantu abathi kaluqondanga udlakela lolu. Omunye wabakusolayo lokhu nguMnu. Mqondisi Moyo, umkhokheli webandla leMthwakazi Republic Party.

“Silokudana ngodlame oluqhutshwa libandla elibusayo. Sebeqalile eMguza kuhlanganisa lodlame esilubone kuMDC-T lakuyo njalo iZANU-PF ngesikhathi samaprimary elections, ukhetho oluzayo lulakho ukubalodlame kulandela izehlakalo esesithe sazibona ngesikhathi singakayi ekhethweni.”

Lokhu kusekelwa nguMnu. Mbuso Fuzwayo, olwela amalungelo oluntu.

“Ibandla leZANU-PF leMDC-T sekufana xathu, udlakela, ukuqila kanye lokwethuselwa kwabantu. Esisanda kudlula kikho kulakho ukuchaphakela kukhetho esikhangelane lalo ngoba akulamuntu ongathi kakubonanga kumbe kakuzwanga. Lokhu kuveza ukwephula amalungelo oluntu okukhetha abantu bekhululekile.”

Abakubandla leMDC-T ekhokhelwa nguChamisa bathi kuyethusa ukuthi abanye babo bayahlukunyezwa ngabantu okumele basebenze labo ukwenzela ukuthi kuguqulwe ezombusazwe lezomnotho eZimbabwe okuyangxele.

Bathi ubuqili kukhetho lama primaries buveza ukungethembeki kwabalandeli bamabandla atshiyeneyo.

Omunye wabasola ubuqili lobu kukhetho nguNkosikazi Nokuthula Ndlovu, okubandla leMDC-T elikhokhelwa nguChamisa. Uthi ubuqili obukhona buhambelana lodlakela olumemethekiswa ngamalunga ebandla leli.

“Amaprimary election aqhutshiwe koBulawayo kodwa sibone abantu abasuka kwezinye indawo bezovota lapha njalo bengela lancwadi ezibonisa ukuba sebabhalisela ukuvota kumbe ukuthi ngabalapha.”

UMnu. Ben Ncube, umgcinisihlalo weZIPRA Veterans’ Association, uthi ibandla elibusayo kanye leleMDC-T kumele ehlukane lobutshapha ababuveza ngesikhathi sokhetho lwama primaries.

Uthi akumelanga lokhu kwenziwe ngesikhathi umthethwandaba weNomination Court uhlela amagama abantu abazancintisa kukhetho oluzayo.

Uthi nxa kungenziwanga lokhu kungenzakala ukuthi ukhetho lwalonyaka lube lodlakela olumangalisayo.

Kasenelisanga ukukhuluma ngodaba lolu leziphathamandla zebandla leZanu PF kanye leze MDC-T ekhokhelwa nguChamisa.

Udaba Esilethulelwe NguAnnastacia Ndlovu
please wait

No media source currently available

0:00 0:03:03 0:00

Facebook Forum

XS
SM
MD
LG