amalinks wokungena

Breaking News

'Udlame lweSouth Africa Lulakho Ukudala Ukusilela Kokudla eZimbabwe'


A private armed security guard

Osomabhizimusi kanye labacubungula ezenotho bathi udlakela olusaqhubeka kweleSouth Africa lulakho ukubangela ukusilela kokudla eZimbabwe kanye lezinye impahla eziqakathekileyo empilweni kazulu.

Umqondisi wenkampani elungisa amafutha okupheka eyeUnited Refineries uMnu Busisa Moyo wethule umbiko enkundleni yeTwitter esithi ubudlwangudlwangu lobu buzakuba lomthelela omubi emhlubulweni wonke wezansi yeAfrica.

UMoyo uxwayise abantu ukuthi balondoloze ukudla, imali lakho konke okubalulekileyo empilweni zabo. Uthe eleZimbabwe lizathwala nzima ngenxa yokuvalwa kwemigwaqo efana leN1 leN2 kanye lalapho okufikela khona izikepe ezithwala impahla olwandle, eDurban Port.

Ukusilala kokudla lempahla eziqakathekileyo lokhu kukhangelelwe ukugxila kweleSouth Africa lapho abantu abaqhubeka begqekeza ezitolo bentshontsha besithi bafuna uMnu Jacob Zuma akhululwe ejele.

Ingcwethi ezinengi zithi zivumelana loMoyo.

“Ukubhebha kweSouth Africa kubuye ngesikhathi umnotho usebenzimeni. Ukukhwela kwentengo eSouth Africa kuzakwenza intengo ikhwele ekhaya, ukuswelakala kwemisebenzi eSouth Africa kuzakwenza iswelakale ekhaya. Impahla kazisoze zingene eZimbabwe,” kutsho uMnu Lubani Nondo, yena ofundisa ngezamabhizimusi eLupane State University.

UNondo uqhubeke wathi umthelela wodlakela lolu uzakwengenza indubo ebezivele zikhona emazweni asezansi yeAfrica kundaba zomnotho lokusilela kwemisebenzi ikakhulu ngenxa yobhubhane lweCovid-19.

“Uyaze ufise ukuba ngabe izinto lezi zabuya iZimbabwe isazimele. Ama investors azaswela indawo yokuba abalekele. Ubunzima lobu kabuphazamisi eleZimbabwe kuphela kodwa liphazamisa iSouthern Africa yonke,” kuchasise uMnu Nondo.

Enye njalo ingcitshi uMnu Mlungisi Dube uthe udubo lolu lulakho ukwengezwa yikuswelakala kwamafutha ezimota ngenxa yokudutshulwa kwesinye isititshi sokulungiswa kwawo kweleMzansi.

Kutsho uDube: “Okwenzakala kweleSouth Africa, kuzaphazamisa amazwe agoqela eleZimbabwe nxa sikhangela izinto ezifana lamafutha ezimota. Amafutha la alakho ukuhlupha okwesikhatshana njalo osomabhizimusi balakho ukusebenzisa lokhu ukukhweza intengo.”

Izakhamuzi lazo zithi zikhathazekile.

“Ukutshengisela kweleSouth Africa kulakho ukuphazamisa eleZimbabwe. Kuzaphazamisa ukuhamba kwempahla esizithola kweleSouth Africa,” kutsho isakhamuzi seHarare uMnu Pride Mkono.

Unobhala jikelele weZimbabwe Congress of Trade Union (ZCTU) uMnu Japhet Moyo yena uthe: “Umnotho weZimbabwe ubambeni lomnotho weSouth Africa; kunengi esikutholayo okuvela phetsheya kukaLimpopo.

“Nxa kulokuxokozela eSouth Africa kungaba lokunyikinyeka kuleli abantu sebeswela izimali ezivela khonale."

please wait

No media source currently available

0:00 0:02:47 0:00

Facebook Forum

XS
SM
MD
LG