UDokotela Peter Magombeyi, owathunjwa ngabantu abacatshangelwa ukuthi badlelana lohulumende kaMongameli Emmerson Mnangagwa, usephumile esibhedlela kwele South Africa.
Lokhu kwethulwe ngeSonto nguDokotela Tawanda Zvavada, osabambe isikhundla sika nobhala jikelele kunhlanganiso yabodokotela eyeZimbabwe Hospital Doctors’ Association, elamalunga akhalala umsebenzi.
UDokotela Zvavada uthi uDokotela Magombeyi, okubikwa ukuthi watshiswa ngomlilo kagetsi njalo wahlatshwa amajekiseni angaziwayo ngabamthumbayo, okwamanje uholwa ngabodokotela engalaliswanga esibhedlela.
Kasenelisanga ukukhuluma ngodaba lolu labamelaphayo, umdeni wakhe kanye leziphathamandla zikahulumende.
UDokotela Magombeyi wavumbuluza phandle kwedolobho leHarare kulensukwana ethunjwe ngabantu abangaziwayo.
Wathi kasakhumbuli okwamehlelayo esithi ulahlekelwa ngumcabango.
Wahlolwa ngodokotela eHarare wacela ukuthi ayekwelatshwa kwele South Africa lapho abekhangelwa khona ingqondo lezinyalo zomzimba kulandela ukuthunjwa kwakhe.
Kubikwa ukuthi watshiswa ngomlilo kagetsi emzimbeni yalabo abamthumbayo.