amalinks wokungena

Breaking News

Udokotela Wezifuyo Usebumbe Elakhe Ibandla Lezombusazwe


UDokotela Carol Nyereyegona

Udokotela wezifuyo, uCarol Nyereyegona, usephawule elinye njalo ibandla lezombusazwe elibizwa ngokuthi yiChief’s Party of Zimbabwe.

UNyereyegona utshele intathelizindaba ukuthi ibandla lakhe selilamalunga amanengi endaweni ezitshiyeneyo kwele Zimbabwe.

Uthi ibandla leli lizancintisa kukhetho oluzayo njalo bazasebenza gadalala ukwenzela ukuhlenga uzulu othwaliswe amagabha avuzayo libandla leZanu PF eselileminyaka engamatshumi amathathu lasitshiyangalo mbili libusa ilizwe leZimbabwe.

UDokotela Nyereyegona ucele abantu ukuthi bavotele ibandla lakhe kukhetho oluzayo lapho azalimele khona kukhetho luka mongameli.

Kodwa-ke abantu abanengi bathi udlala ngesikathi ngoba sokulamabandla edlula ikhulu lamatshumi amabili kwele Zimbabwe aphikisa eleZanu PF.

Omunye wabasola ukubunjwa kwamabandla amanengi aphikisayo nguMnu. Dingane Dliwayo othi amabandla la adlala ngabantu abahluphekayo.

Lokhu kusekelwe ngosakhulayo uSibangani Ndlovu othi amabandla la kawasoze asuse ele Zanu PF embusweni angaqhubeka edlala ngozulu.

Abebandla leli le Chief’s Party in Zimbabwe bathi bakhetha leligama ngoba kulibandla elisebenzisana kakhulu lenkokheli yomdabu lozulu kakhulukazi emaphandleni.

Bathi abangakho bona yikusebenzela uzulu lokulungisa konke okoniwa nguhulumende webandla leZanu PF.

Facebook Forum

XS
SM
MD
LG