amalinks wokungena

Breaking News

Udubo Lwemali Lentshintshi Luqhubekela Phambili koBulawayo


Bulawayo Cash-Bank queues
Bulawayo Cash-Bank queues

Izakhamizi zakoBulawayo ziveze ukukhathazeka okukhulu ngokuqhubeka kwenhlupho zokusilela kwemali emabhanga kanye lendwendwe ezinde zabantu abatshona belayinele ukuba bayithole emabhanga.

Abantu bathi lezi nhlupho zemali lezinye seziqhelisa ngamandla umkhuba omubi, wenkohlakalo emsebenzini wemali kanye lokuthengiswa kwemali emkambo wensitha.

Abamavinkili labo bakhala ngokuthi sebesehluleka ukuqhuba kuhle umsebenzi ngoba bebhekane lodubo lokuswela imali ezincane zemali yeMelika ukuba baphe abantu intshintshi ngemva kokuthengisa.

Inengi labantu bakoBulawayo lokhu libhekane lodubo olukhulu lokuthola imali emabhanga, kuthi laleyo egcinelwa kumakhalekhukhwini eyeEcocash ayisebenzi kahle emavinkilini amanengi, osekutshiye inengi labantu lisebunzimeni ngesikhathi ilizwe libhekane lokuvimba ukusabalala kweCOVID-19.

Isakhamuzi seNkayi, uMnu Cosmas Mafu uthi lasemaphandleni imali iyabahlupha ukubamba.

“Ilizwe okungasaziwa khona imali. Emaphandleni asisazi ukuthi sizaphinda siyibambe. Lona idola lemelika kunzima ukuthola insthintshi, ekhaya imali sayicina kudala labodokotela abasesigodlweni asazi ukuthi basebenzani lona ilizwe libhekane lodubo olungaka. Lokhu singakufananisa lokuthi leli ilizwe kwafela uhlanya umoya walo uyavunguza”

UNkosikazi Agnes Ndlovu waseKezi laye uvumelane loMafu ethi inshinsthi yiyo esiluhlupho emavinkilini.

“Okwemali yakithi le eyokugxobhelela kunzima kuntshitntshi uyabe ufisa ukuthenga kodwa kunzima ezitolo ayitholakali thina oGogo kurate yebond lerand kuyasiphica uyabe ungasazi ukuthi kumi njani lokhu kunzima.”

Osakhulayo wasemzini wePumula, koBulawayo, uPresnat Ndlovu uthi ukusilela kwemali ngempela kuluhlupho olulokhu luqhubekela phambili kungela lasibonelo sokuthi luzafa lwaphela kusikhatshana esincane esilandelayo.

“Intshintshi ludubo olukhulu imali ayitholakali loba ungaze ungene ngaphi loba uthenga ngeswipe kumbe nge ecocash ayitholakali imali njalo izinto ziyadula. Loba ulecash intshintshi ayitholakali uyaqeda amahola phose amathathu udinga kumbe umele intshintshi lokhu kuludubo alomangalisayo.”

Ngesikhathi kusungulwa umkhambo wokuthenga lokuthengisa imali yakwamanye amazwe osemthethweni owe Foreign Exchange Auction, oqondiswa ngabebhanga elikhulu lelizwe eleReserve Bank of Zimbabwe-RBZ, umphathintambo wezemali, uMnu Mthuli Ncube uthembise uzulu ukuba usezakwenelisa ukuthola imali lula emabhanga njalo udubo lokusilela kwemali seluzahle luphele elizweni. Kodwa udubo lolu lokhu luqhubekela phambili, lendwendwe emabhanga lemagalajini sekuyinhlalayenza, ingcwethi zezempilakahle zisithi lokhu kufaka uzulu engozini yokuthelelana lula igcikwane leCovid-19.

XS
SM
MD
LG