amalinks wokungena

Breaking News

Udubo Lokusulela Kokudla Okwakha Umzimba Luyaqhubeka eZimbabwe


Inhlanganiso ezabela abantu ukudla eZimbabwe seziveze ukukhathazeka ngokusilela kokudla okwakha umzimba ebantwaneni abaleminyaka engaphansi kwemihlanu – i-Malnutrition, okuyikho osokubangela ukulahlekelwa ngumphefumulo ebantwaneni abayisilinganiso sokungamatshumi amabili lanhlanu ekhulwini – 25%, elizweni, okulinani elesatshelwa ukuthi lingaqonga ngenxa yendlala ekhangelelwe ukuba khona lonyaka.

Ngeviki ephelileyo umsekeli kamongameli uMnumzana Emmerson Mnangagwa wethule uhlelo olwe Zimbabwe National Nutrition Strategy oluqhtutshwa kusukela lonyaka kusiyafika u2018. Ngaphansi kohlelo lolu, ilizwe lidinga ukuqeda udubo lokusilela kokudla okwakha umzimba.

Inani labantwana elibhekane lendlala kanye lemizimba engabukekiyo ngenxa yokusilela kokudla okwakha umzimba – i-stunted growth, liya likhwela okubikwa selifike kumntwana oyedwa kwabathathu.

Inhlanganiso ephatheke ekunikeni uzulu ukudla i-World Food Programme ekucubunguleni kwayo, ithi lokhu kubangelwa yikuwa kwenotho yelizwe osokutshiye abazali abanengi bengasebenzi, ukungani kuhle kwezulu kanye lokwehla kwemali esekela abaswelayo. Ingcitshi zezokudla okwakha umzimba zithi inengi labantwana selithola ukudla okuphiwa abadala kukhohlakale ukuthi bona balendingeko ezitshiyeneyo ukuze imizimba ikhule kuhle.

Esethula lolugwalo, uMnangagwa uthi dubo lolu lokusilela kokudla okwakha umzimba akungeke kwaqedwa luhlangothi olulodwa kodwa kumele abantu babambisane bephathisana. Uthi uhulumende ukhathazekile ngenani labantwana elifa ngenxa yokuswela ukudla okwakha umzimba.

Umnumzana Silas Mangena, oyisakhamuzi, uthi ukubhidlika kwenotho yelizwe kanye lendlala eseyangena kuzulu yiyo esibangele ukuthi abantwana baswele ukudla okwakha umzimba. Uthi ukusilela kwemali kwenza abazali bakhangele ompuphu labotshukela bakhohlwe ukuthi abantwana badinga ukudla okutshiyeneyo kulalokhu okudingwa ngabadala. UMangena uqhubeke esithi inengi labantwana selingenelwa yimikhuhlane lula nje ngenxa yokungaqini kwemizimba. Uthi njalo abantwana abakhula bengaqinanga bafika njalo bathwale nzima lalapho sebesiya ezikolo bangaze baqhuba kuhle.

Unkosikazi Nosipho Mabhena, ophathiswa ukulima ethelela yinhlanganiso ye World Food Programme, esiqintini seInsiza, uthi ukuphathiswa lokhu kuqakathekile ngoba bakhuthazwa ukulima izilimo ezakha umzimba hatshi ukuthi abantu baphile ngesitshwala lombhida njalonje. Uthi sebehlanyele lezihlahla zezithelo ukuthi basize abantwana kanye labadala abahlaselwa yimikhuhlane etshiyeneyo edinga ukuthi umuntu athole ukudla okwakha umzimba.

UNkosazana Rita Phiri, oyingcwethi kwezokudla, uthi kuqakathekile ukuthi nxa kukhulunywa ngempilakahle kuleli kukhulunywe ngokunika izizalwane, ikakhulu abantwana, hatshi ukudla okunengi kuphela kodwa ukudla kwenhlobonhlobo ezitshiyeneyo okuyikho okwenza umntwana akhule engahlaselwa yimikhuhlane njalo esenelisa ukwenza konke okwenziwa ngosowabo abathola ukudla okufaneleyo. Uthi ukusilela kokudla okwakha umzimba yisilo esisengene sadiliza izigaba ezinengi zelizwe eseziphelelwe ngabantwana kwathi lalabo abaseleyo baba ngabangaphilanga.

Uhulumende wabeka ikhomithi ukukhangela ukuthi izizalwane, ikakhulu abantwana bangathola njani ukudla okwaneleyo okwakha imizimba kulandela ukwethulwa uhlelo lwe Zimbabwe Food and Nutrition Security Policy, kodwa kukhanya likhomithi ayikatheli izithelo.

Ugwalo lolu lweZimbabwe National Nutrition Strategy lwabunjwa nguhulumende encedisana lenhlanganiso ezizimele zodwa ezigoqela i- World Food Programme, i- World health Organisation, i-United Nations Children’s Fund lezinye ezinenginengi. Ngimele iStudio Seven koBulawayo, ngingu Nothando Sibanda.

XS
SM
MD
LG