Amapholisa avimbe ukuqhutshwa komthandazo obuqoqwe ngenjongo yokuthandazela omahluli abazokwahlulela udaba lokuphikisa impumela yokhetho olwethulwa ngumkhokheli weMDC Alliance, uMnu. Nelson Chamisa lokunye okunenginengi obuzenzelwa endaweni yokukwejisela eye Harare Gardens.
Lokhu kwenzakala kulandela ukwethulwa kwamaphepha aphikisa isicelo sikaChamisa awethulwe ngumgcinisihlalo wogatshwa lwezokhetho, iZEC, uNkosikazi Priscillah Chigumba othi alulahlwe udaba luka Chamisa.
Awusaqhutshwanga lumthandazo obekumele uqale ngehola letshumi ekuseni ngoba amapholisa ehle ayagombolozela inkundla ye Harare Gardens.
Lumbuthano ubukhokhelwa ngumqondisi wenhlanganiso ye Zimbabwe Devine Destiny u Bishop Ancelimo Magaya okuyingxenye yomanyano we MaM okugoqela inhlanganiso ezithi eye United Citizens Alliance - UCA, Zimbabwe Devine Destiny - ZDD kanye le Prayer Network of Zimbabwe – PNZ.
Lumsakazo ukhulumisane loMagaya eHarare Gardens lapho bekunyakazela khona amapholisa indawana yonke.
Omunye wabakade beze ukuzaphatheka kulomthandazo ngu Father Brian Mogary we St Peters Kubatana emzini we Highfield kubandla le Roman Catholic.
U Father Rungano Muchineripi obekulombuthano ovinjwe ngamapholisa uthi simmangalisile lesi senzo sokubalisa ukuthandaza.
Umqonsdisi wenhlanganiso ye United Citizens Alliance – UCA uMnu. Joelson Mugari uthi kazwisisi ukuba kungani bevinjiwe ukuqhuba lumthandazo.
Omunye wabalwela ilungelo loluntu lenhlalakahle kazulu elizweni, umnumzana Charles Nyoni usole lokhu kwenza kwabasesipholiseni.
UNyoni uthi osekusenzakala akuhambelani lenkulumo kahulumende okhona ukuba uzalalela okutshiwo nguzulu.
Lokhu kwenzakala umgcinisihlalo we ZEC, uChigumba ethule amaphepha aphikisa isicelo sikaChamisa esisemththwandaba we Constitutional Court esokuphikisa impumela yokhetho. UChigumba uvumile ukuba kulenkulungwane zamavoti ezaphiwa uMongameli Mnangagwa zimele ziye kuChamisa.
Kodwa uthi amavoti la awangeke enza ukuba uChamisa abe nguye owanqoba kukhetho.
Ngalokho uthi asilahlwe isicelo sika Chamisa ngoba sethulelwa umthethwandaba amalanga avunywa ngumthetho esedlule.
Umthethwandaba uzaqala ukuhlaziya loludaba ngoLwesithathu oluzayo.