amalinks wokungena

Breaking News

Ugqitshwa eHarare Umbukiso Walonyaka Owe ICT Africa 2014


ICT Africa 2014- Zimbabwe
ICT Africa 2014- Zimbabwe

Umbukiso omkhulu wezokukhulumisana ngemitshina yakulezinsuku yamacomputer, owe ICT Africa 2014 uphele ngoLwesihlanu eHarare. Libikwa belehlile okwamagama inane lababukisi lonyaka kodwa inhlanganiso elwisana lokuhlukuluzwa kwabantwana eye Child line Zimbabwe ihle yathatha lelo thuba ukuqinisa ukusebenzisa indlela zeICT ukuphathisa abantwana abasenkingeni.

Lumbukiso osungulwe ngoLwesithathu ubulababukisi abedlula kancane amatshumi amabili, okulinani elehle ngesilinganiso sokulitshumi ekhulwini-10% kulelanyakenye.

Omunye wabaqondisa loluhlelo ongafunanga ukuziveza ibizo lakhe uthe noma kulokwehla okunje kulinganiswa lanyakanye, umumo wama stand alonyaka ubungcono kakhulu ethi futhi noma abamabhizimusi akwele zansi ye Africa bengenelisanga ukubuya amabhizimusi amanengi akuleli atshengisa imitshini lezinto ezivela khona e zansi ye Africa lase Emirates.

Inhlanganiso elwisana lokuhlukuluzwa kwabantwana eye Child-Line ngenye yenhlanganiso enelise ukubukisa njalo ithi isiphakathi kokuqinisa lokuqhelisa umsebenzi wokusebenzisa indlela ze ICT ukuze abantwana benelise ukuthola uncedo kungela mbadalo ngokutsho kuka nkosazana Caroline Foya walinhlanganiso:

Uthi abantwana balakho ukusebenzisa wonke ama network akuleli agoqela i Telecel, Econet le Net-one ukuthola uncedo bengabhadaliswa ukutshaya incingo zabo ethi baphathisa abantwana ngendlela ezitshiyeneyo hatshi abayabe sebehlukuluziwe kuphela:

Phakathi kwamalanga amathathu uFoya uthi benelise ukucasisela abantu abanengi okugoqela labantwana bezikolo ngendlela entsha le abayithuthukisayo ethi kukhanya isamukelwa njalo ithakazelelwa okwamagama.

Lindlela izakwenza ukuba abantwana benelise ukuphathiswa lasebulenjini ngendlela esebenza sikhathi sonke ebusuku lasemini kungavalwa okuthiwa yi 24 hour Counselling njalo kuvunyezwa labantwana abayabe befuna ukuthola umuntu abangakhuluma laye noma bengakabi lodubo lokuhlukuluzwa.

Umbukiso walonyaka ungenwe ngabakumabhizimusi abona ngezencingo , omakhalekhukhwini lama computer okugoqela i Econet wireless ,Telecel Zimbabwe, i Nashua le Computer Society of Zimbabwe phakathi kwamanye.

XS
SM
MD
LG