UMongameli wesikhombisa wakwele Zambia, uMnu Hakainde Hichilema namhla ugcotshwe ukuthatha intambo zombuso emkhosini owenzelwe enkundleni eyeNational Heroes Stadium, esigodlweni salelo lizwe eseLusaka. Ele Zimbabwe belimelwe nguMongameli Emmerson Mnangagwa lomkhokheli weMDC Alliance, uMnu Nelson Chamisa.
Ukungena kuka Hichilema esikhundleni sekulethe ithemba kwamanye amazwe awezwekazi leAfrica, lokuba balakho ukukhipha uhulumende oncindezela uzulu ngoba encintise kwaze kwaba kahlanu andubana anqobe kukhetho.
Ekhuluma emkhosini wokugcotshwa kwakhe uMongameli Hichilema uthe iZambia ifundise amazwe wonke omhlaba ukuba amandla ezombusazwe asebantwini, esithi kuzamele uhulumende wakhe atshiyane lombuso kantando kayiphikiswa.
“Amandla kasiwo ethu, ngawabantu, abantu be Zambia. Kuyathabuthisa ukuba namhlanje ngokwesithathu selokhe abantu be Zambia baguqula ohulumende, saba labo hulumende abatsha”
UMongameli Hichilema uthe uzazame ngazo zonke indlela ukuqeda ubuyanga eZambia esithi uzakwenza lokhu ngokuqakathekisa ubudlelwano be Zambia lamanye amazwe womhlaba.
Ummeli we Hwange Central engowe MDC Alliance uMnu Daniel Molokele uthe bazazama ngendlela zonke ukulandela isibonelo esihle sokwenziwe libandla ebeliphikisa eleUPND elinqobileyo eZambia kukhetho luka 2023 e Zimbabwe.
“Asengamhlophe athe nke, thina njengo makhelwane siyaziqhenya ngalokho esikubone kusenzakala e Lusaka. Siyawubona umzekeliso wakho omuhle sizazama ngamandla ethu onke ukuba siwulandele”
UMnu Baster Magwizi omunye wabalwa impi ye nkululeko, owahlala isikhathi eside ekwele Zambia, uncome uMnu Edgar Lungu ngokuvuma ukudedela uHichilema.
“Kuyisifundo kwamanye amazwe, abanjengabakithi ukuthi intando kazulu kayiphikiswa ikakhulu mayelana ngamalungelo abo”
Kodwa omsekeli womsebenzi kubandla le ZANU PF kuhlangothi lwabatsha uMnu Mabutho Moyo uthi abamabandla aphikisayo eZimbabwe bangaziyengi ngokwenzakale eZambia.
“Lokho okwenzakale e Zambia kakusoze kwenzakala e Zimbabwe. IZANU PF libandla elikhulu kakhulu. Kakusoze kwaba le nguquko yaloluhlobo ngoba e Zambia vele kulamabandla amancane”
Abanye abakade besemkhosini weZambia bagoqela uMongameli Cyril Ramaphosa wele South Africa, uMongameli Uhuru Kenyata wele Kenya, uMongameli Mokgweetsi Masisi wele Botswana, Lazarus Chakwera
owe Malawi, abameli benkokheli yamazwe angentshonalanga, labenhlanganiso eye Common Wealth.
Uhambo lukaHichilema belungalula ukuze afinyelele intambo zombuso ngoba wahlukunyezwa okwesikhathi eside etshaywa, ebotshelwa amacala okubazelwa okugoqela isehlakalo sokubotshelwa ukwephula umthetho womgwaqo ngo mnyaka ka 2017 kodwa lelo cala lacina lisiba ngelokufuna ukugenqula uMongameli Ernest Lungu.
Kodwa kusenzakalo esimangalise abanengi, uHichilema yena owayesazakala njengesitha selizwe phansi kukahulumende ka Lungu, unqobe okulesisindo kukhetho olwenziwa mhlaka 12 Ncwabakazi.
Lokhu sokulethe idlabuzane lethemba kwele Zimbabwe ukuthi mhlawumbe isimo singaguquka phakathi kukaMnangagwa loChamisa kukhetho olulandelayo lomnyaka ka2023.