amalinks wokungena

Breaking News

UGift Ncube, Isizalwane seZimbabwe Esidutshulwe Izandla Sidinga Uncedo


Gift Msipa
Gift Msipa
Udaba luka Gift Ncube, isizalwane seZimbabwe esidutshulwe izandla zombili ngumqatshi eBotswana ngesikhathi esiyathatha imali abeyisebenzele, seluthinte inhliziyo zabeZimbabwe abakwele South Africa, okumanje asebeqoqa imali yokudingela u Gift izandla zokufakelwa lalo lonke uncedo aludingayo empilweni yakhe. UBenedict Nhlapho uxoxa labeZimbabwe laba ngohlelo lwabo lokusiza uGift.

Akaselazandla, akasazidleli, kasenelisi ukuzisiza esambuzini, kanti uthi akasaboni ukuthi usaphilelani, kungakhonje abeZimbabwe kwele South Africa sebemdingela usizo lwesiphangi phangi.

Lesi yisimo esesibhekane loGift Ncube odabuka koMalalume kwele Mandebeleni, obeyinsizwa eqine saka njalo esebenza nzima. Njengenengi lentsha yeZimbabwe laye ubunzima bempilo bamthatha bamusa kwele Botswana.

Ngemva kokuthola umsetshenzana wokugamula izihlala evula indawo yokulima epulazini lesizalwane seBotswana umnumnzana Keitumetse Khunowu enyangeni edlulileyo, uGift ubethabe emanzi te njengoba bekungumsebenzi obuzamupha inkulunwane ezine zamaPula- P4000.

Ngemva kokusebenza gadalala, ucunuke kakhulu uNcube njengoba umqatshi wakhe ethe esemuphe imali engangamaphula angamakhulu athoba minwe mbili- P800, wathi sokwanele akaphume aphele emzini wakhe.

Kungalinde muntu lumqatshi uthethe uvolovolo lwakhe wazithela ziselekana inhlamvu ezine kuGift, okwenze nxa efika esibhedlela wahle waqunywa izandla zombili ngoba zilimele isihluku.

Isimo lesi uGift asephakathi kwaso sesenze izizalwane zeZimbabwe kwele South Africa zisukume ukuze zisize linsizwa elokhu ibubula esibhedlela seMahalapye eBotswana.

Unkosazana Nomazulu Moyo odabuka emangweni we Gohole, eKezi esezansi yakwele Mandebeleni, uthi njengomama ozeleyo, uzwe loludaba kwahela esiswini, wakubona kufanele ukuthi asukume akhokhele uhlelo lokudingela uGift usizo lwesiphangiphangi.

UMaMoyo ukhuthaza zonke izizalwane zeZimbabwe ezisemazweni ukuthi zisukumele phezulu kuloludaba zikhumbula ukuthi okwenza uBhanda loPhiri laye kungamenza. Uthi imali zonke eziqoqiweyo zizasetshenziswa ngendlela esegcekeni, ezalawulwa yibo bonke abaphe uziso lwalimali.

Umnumnzana Dingindlela Dube odabuka koSpepa eTsholotsho, ngomunye wasebelusukumele loludaba abasebenza ndawonye loMaMoyo.

Lintatheli ikhulume lezizalwane zeZimbabwe ezitaladeni zeGoli, lazo ziyavumelana lonkosazana Moyo ukuthi sekungumthwalo wabeZimbabwe abasemazweni ukusiza omunye wabo.
Umnumnzama Witness Ncube ngomunye walabo abakhuthaza ukuthi abeZimbabwe bonke abasemazweni baphatheke ehlelweni lokusiza uGift.

Umnumnzana Dingindlela Dube ukhuthaza ukuthi uKhunowu owenze lesi sihluku kufanele ajeziswe ngesihluku besekusithi uhulumende weBotswana ahlawule uGift imali azaphila ngayo okwempilo yakhe yonke.

Okwamanje okwazakalayo yikuthi uKhunowu useke wavela emthethwandaba ebhekane lecala lokulimaza umuntu ehlomile.

Kodwake abadingela uGift usizo bathi njengoba impumela yaleli cala ingasoke ibuyisele izandla zikaGift endaweni yazo, thintana labo kufacebook egameni elithi Nomazulu Moyo Nomz, ukuze linsizwa ithole usizo lwesiphangiphangi.
XS
SM
MD
LG