amalinks wokungena

UGift Ncube Owadutshulwa Ngumqhatshi eBotswana Usebuyele eZimbabwe

  • Martin Ngwenya

UMnu. Gift Ncube.

Esinye isizalwane seZimbabwe, owalahlekelwa yizandla zombili ngemva kokudutshulwa ngowayemsebenzela kweleBotswana ngomnyaka ka2013, uthi useyehlulekile ukuthola uncedo emthathwandaba lokudinga ukuhlawulwa ngakho usebona kungcono ukuphindela ekhaya.

UMnumnzana Gift Ncube utshele intathelizindaba yeStudio 7 ukuthi kodwa kuzakubalukhuni ekhaya ngoba engalandawo yokuhlala njalo engasenelisi ukusebenza.

UNcube uthi akusela ngenye indlela ngaphandle kokwamukela ukuthi kasoze athole usizo loba inhlawulo ngemva kokuba umthethwandaba ulahle udaba lwakhe lokudutshulwa ngowayemsebenzela nyakenye.

Kade elokhe elwisana lokuthi athole inhlawulo kodwa uthi abamcedisayo okugoqela amagqwetha bathi kunzima ngoba walahlekelwa ludaba emthethwandaba. Uthi uphila nzima ngoba abantu labo abasafuni ukumnceda.

"Bengincedwa ngabantu abafana labe sonto labosomabhizimusi azimeleyo … Ngiyehluleka lokuhlawula imali yendawo lapho engihlala khona. Ngacina ngixotshiwe lapho engangihlala khona ngoba ngasengikweleda imali engange P6,000."

Ngokunjalo, uthi sebone kungcono ukuthi aphindele ekhaya lapho angathola khona uzwelo eselizweni lakhe ngoba kumgceke ukuthi akulalutho azaluthola eseBotswana.

UMnu. Gift Ncube waqunywa izandla aze adutshulwe ngumqhatshi.
UMnu. Gift Ncube waqunywa izandla aze adutshulwe ngumqhatshi.

"Sengicabanga ukuthi iwofisi yeZimbabwe lapha ingiyenze incwadi ngibuyele ekhaya njalo ikhaya lihle izikhathi zonke abantu bangangizwela bengangiphathi njengokuthi ngingumuntu wokuza ongene elizweni labo engalamaphepha."

Kodwa noma efisa ukubuyela ekhaya, uthi kuzabanzima kuye ngoba isehlakalo sika 2013 samtshiya engelazandla zombili, okutsho ukuba akasenelisi ukusebenza. Uthi futhi kalandawo yokufikela ekhaya, ekhala ngokuthengelwa izandla zokubazwa ukuze ayenelise ukuzenzela eminye imsebenzi yokuziphilisa.

"Bengifuna izandla ukuze lami noma nje ngingelakhaya ngiyenelise ukusebenza, ngingenelisa ukuzama zama okuncane."

UNcube wehlelwa yingozi ngemva kokuba esebenze ukugebha ensimini yomunye undoda oyisizalwane sakweleBotswana emlageni oseduze ledolobho leFrancistown. Wathi esiyathonisa iholo lakhe, undoda owayemqatshile wahwatsha umbhobho wamdubula, wathi efika esibhedlela kwathiwa sokufanele aqhunywe ingalo zombili.

Umthethwandaba waphezulu oweFrancistown, uthole umadubula uNcube engelacala, umahluli esithi wayezama ukuzivikela ekuthonisweni kwecala okumgceke ukuthi umahluli ukhethe ukweyamela lokukholwa icele lesizalwane seBotswana kulokuthi akholwe kumadutshulwa owayelakho ukulahlekelwa yimpilo kulesi sehlakalo.

Facebook Forum

XS
SM
MD
LG