Owaxotshiswa nguMnu. Sengezo Tshabangu kudale lephalamende emele isigaba se Pelandaba-Tshabalala, uMnu. Gift Ostallos Siziva usephanyeke amaphepha okuncintisa kukhetho lwama by elections oluzaqhutshwa ngoNhlolanja ngomnyaka ozayo emele ibandla le CCC.
Lokhu sekucaphule uTshabangu othi uzamvimba ukuba ancintise kukhetho lolu njengalokhu okwehlele abanye bakhe kukhetho lwama byelections olwaqhutshwa mhlaka 9 Mpalakazi. Umthethwandaba we Nomination Court wamukele amaphepha abazancintisa ezigabeni eziyisithupha endaweni ezitshiyeneyo zelizwe.
USiziba uzancintisana loNkosikazi Moreblessing Tembo ophansi kwecele leCCC elikhokhelwa nguTshabangu, uMnu. Joseph Tshuma webandla leZanu PF loMnu. Yona Nkomo oweDemocratic Party uma engavinjwangwa ngumthethwandaba. Abane laba baphanyeke amaphepha abo edale leNomination Court koBulawayo. UNkosikazi Sithembiso Khuphe okukhomishini yeZimbabwe Electoral Commission wethulele intathelizindaba amagama alabo amaphanyeke amagama abo.
"Idale selivalile ukuthatha amaphepha, abayenelise ukuphanyeka amaphepha abo nguYona Abraham weDOP, uMnu Ostallos Siziva lo, uMoreblessing Tembo abeCCC loJoseph Tshuma weZanu-P. Kusasa ekuseni kusukela ngo 10am kusiya ku4pm idale liyabe livulile ukuze wonke umuntu azehlola ukuthi inomination ihlale njani."
Umqondisi wekhomishini yeZimbabwe Electoral Commission, uMnu. Etoile Silayigwana, laye uthi baqhube kahle umsebenzi wabo eNomination Court.
"Lapha koBulawayo idale leNomination Court lihlale kuhle njalo kusiya ngokuthi kuphumeni kumadale abehleli ezweni lamhlanje sizakuba lama by-election kuzigaba eziyisithupha ezibalisa khonapha koBulawayo, eGoromonzi South, SEke, Chegutu West, Zvimba east leMkoba West lakumakhanili ayi 29 NgoNhlolanja 3."
UNkosikazi Otilia Sibanda, obemele uNkosikazi Tembo, uthi iNomination Court iqhubeke kuhle umsebenzi wayo.
"INomination ihambe kuhle asizange sibelohlupho leZEC, Sesikhangelele umkhankaso olokuthula ngoba loMoreblessing Tembo ngumntwana weTshabalala ukhulele eSizinda ngakho sikhangelele ukuthi limsekele umntanenu oyintombazana."
UKhansila Donaldson Mabutho, ophanyeke amaphepha kaSiziba, walile ukuchaza isizatho sokuba labantu ababili abeCCC abaphanyeke amaphepha eNomination Court esithi uSiziba wenza okusemandleni akhe.
"Sisempini ngeke siphume ekhaya ngoba sekungene umuntu omelana Labantwana balelokhaya njalo asesabi lutho siyaphela sibone ukuthi kuyaphetha njani asilavalo."
Lokhu kucaphule uTshabangu othi uzavimba uSiziba ngoba waxotshwa kubandla leCCC. Igqwetha lika Tshabangu, uMnu. Nqobile Sithole, uthi uSiziba uchithe isikhathi sakhe ngokuya eNomination Court.
"Sizakuya edale ukuyamisa uMnu Siziva njalo njengomuntu ohlakaniphileyo owaziyo ukuthi ulabantu abamsekelayo ngabe ungene ezimele kumbe wangena ngelinye ibandla ngoba ubuqholo abubhadali uma ibandla lithe phuma ukuba lilunga ledale lephalamende uphinde uye enomination court uyabe uchitha isikhathi.”
Kuzaqhutshwa ukhetho lwama byelections elizweni lonke jikelele lokudinga abazamela izigaba eziyisithupha edale lephalamende njalo lezigaba ezifika phose amatshumi amathathu zamakhansili. UTshabangu waxotshisa ababemele izigaba lezi esithi sebexotshwe kuCCC. Kodwa icele leCCC eliphansi kuka Mnu. Nelson Chamisa lithi uTshabangu wenza okusekhanda lakhe njalo okungekho emthethweni ebambisana lebandla leZanu PF. Okwamanje uChamisa labanye bakhe sebemangalele uTshabangu eZEC ngokusebenzisa isithombe sakhe kukhetho.
Forum