amalinks wokungena

Breaking News

Uzulu Ucaphulwa nguGrace Mugabe Othi UMugabe Uzabusa Eku Wheelchair


UNkosikazi Grace Mugabe uthi umkakhe uzabusa aze ahlale esitulweni sokufuqwa ese wheelchair.

Inengi lezizalwane zeZimbabwe zizonde okumangalisayo ngamazwi kaNkosikazi Grace Mugabe athi uMongameli Robert Mugabe ulakho ukubusa loba esehamba ngesithulo sabagogekileyo i-wheel chair, kumbe engasaboni.

Ukhulume lokhu emhlanganweni awenze eMurehwa ngempelaviki oyingxenye yaleyo eyenza ilizwe lonke ayibiza ngokuthi yi ‘Meet The People Tour’.

Uthe, “Ngithe sizalungisa izitulo sokuhlalisa uMongameli Mugabe nxa engasenelisi ukuhamba. Ngizabe ngimfuqa ngewheel chair. Akumelanga sesabe lapha. Sesike sahamba emazweni amanengi lapho okubusa khona abantu abangaboniyo.

“Kodwa-ke lapha uMugabe uyabona loba engasaboni kumbe engasahambi sizamlandela kuphela. Kambe sethuswa yini la?”

Kulabanye abathi uNkosikazi Mugabe uyitshaye ekhaleni. Omunye walabo abavumelana laye nguMnu. Gadzirai Chirumanzu olandela ibandla leZanu PF othi uNkosikazi Mugabe ubekhuluma ngokuthi inengi labantu lithanda uMugabe elemvotela ukuthi abuse ngendlela abayifunayo.

UChirumanzu uthe kuyenzakala ukuthi abuse esehlezi esitulweni sabagogekileyo njengalokho okukhulunywa nguNkosikazi Mugabe.

Odokotela esixoxe labo bathi kababoni nkinga nxa uMugabe usehamba ngesithulo sabagogekileyo kumbe engasaboni elokhe ebusa. Bathi okuqakathekilayo yikuthi uyabe elegqondo ezeneleyo.

Kodwa-ke uNkosazana Thabitha Khumalo umsekeli wesikhulumeli sebandla leMDC-T utshele iStudio 7 ukuthi akumangalisi okukhulunywa nguNkosikazi Mugabe.

“Kahambe ayekhangelana lezizukulwane zakhe hatshi abantu bonke beZimbabwe. Siyakwazi ukuthi uGrace Mugabe nguye obusayo. Lokhu akukhulumayo akumangalisi.”

Udokotela Ruth Labode okubandla leMDC-T uthi kuyenzakala ukuthi uMugabe abuse esehamba ngesitulo sabagogekileyo kumbe engasaboni.

ULabode okhulume lokho ezimele njengodokotela hatshi ibandla leMDC-T uthe, “Engikunanzelelayo yikuthi akumelanga ukuthi abantu bacabange ukuthi ukuhamba ngeisitulo lesi umuntu uyabe esefe ingqondo. Bakhona abanjengalowo owayengu mayor wakoBulawayo uMnu. Joshua Malinga owayesikhundleni lesi elesitulo lesi.

“Lokhu kutsho ukuthi ingqondo yiyo eqakathekileyo hatshi umzimba womuntu kuphela.”

XS
SM
MD
LG