amalinks wokungena

Breaking News

UTown Clerk weHarare Umiswa Umsebenzi


Harare Council Offices
Obephethe isikhundla sika Town Clerk kumanisipala we Harare umnumzana Tendayi Mahachi usemiswe umsebenzi okwenyanga ezintathu kusukela mhla ka 30 Zibandlela 2014. Emazwini akhe phezu kwalesi sehlakalo eTown House ngoLwesine, uMayor walelidolobho umnumzana Benard Manyenyeni, utshele intathelizindaba ukuba lesisinqumo sithethwe kulandelwa umthetho we Urban Council's Act.

U Manyenyeni utshele umhlangano lentathelizindaba ukuba njengoMayor wedolobho le Harare ukubone kufanele ukuthatha lelinyathelo ngemva kokuba sekuvele sobala ukuba wehlulekile njengo Town Clerk u Mahachi ukuwuqhuba ngendlela umsebenzi wakhe.

Ubike ukuba phezu kwakho konke uqinise ikhanda u Mahachi wala njengenkokheli ukulandela obekudingsiswa phezu kweholo iziphathamandla zekhansili okugoqela laye ngokwakhe.

Inhlanganiso ezimela uzulu we Harare okubalisa eye Harare Residents Association ( HRT ) kanye leye Combined Harare Residents Association ( CHRA ) baveze ukusijabulela lesi sinqumo sokumiswa kuka Dr Mahachi umsebenzi.

Izakhamizi ze Harare le Chitungwiza lazo zikwamukele ngazo zombili lesi sinqumo sikaMayor zisithi bekuvele sekuphuzile.

Omunye walezi zakhamuzi ezijabulele lesi sehlakalo ngunkosazana Metline Tsamba ongumama omutsha njalo eyisakhamuzi seChitungwiza kodwa esebenzela edolobheni le Harare.

Ubehlala koBulawayo unkosazana Tsamba kodwa uselenyanga eziyisitsiyagalombili ethuthele emzini weChitungwiza. Uthi mkhulu umahluko phakathi kwabomanisipala ababalisa oweHarare le Chitungwiza, kundlela abaphatha ngayo umsebenzi wokutholisa uzulu okudingakalayo okufana lamanzi ahlanzekileyo nxa eqathanisa lalokho okwenzakala koBulawayo lapho athi kazikho zonke lezinhlupho asehlangana lazo selokhu wazahlala ngapha kwelizwe.

Ngesikhathi loludaba lulotshwa bekungakazakali ukuba ngubani ozabephethe lesisikhundla sokuba ngu Town Clerk ngemva kokumiswa kuka Mahachi umsebenzi lanxa uManyenyeni ubeveze ukuba uzakube esekhethiwe lowo muntu lisiyatshona ilanga lalamuhla.

Uthi uManyenyeni ngemva kohambo lwakhe kunsukwana ezisanda kwedlula, lapho abhode emalokitshini ukuze azibonele ngokwakhe phezu kwendubo uzulu abhekane lazo, unanzelele ukuba umumo kawumuhle, ikakhulu emalokitshini abalisa ele Warren Park, Kuwadzana, Tynwald,Tafara, Mabvuku le Mbare.

Uveze njalo ukuba ama khansila akhethiweyo aveze ukuba azimisele ukusebenza nzima ukulungisisa lomumo ongemuhle edolobheni kungakhathalekile ukuba imali iyasisela.

Ukhuthaza njalo uzulu ukuba aphathise ngazo zonke indlela ukuvuselela isimo sedolobha le Harare lapho athi bakhululekile ukupha amacebo, abafisa ukuphatheka kulolu hlelo.

Ukuthuthukiswa kwendawo ehlanzwa amanzi ye Morton Jeffery Water Ways,ukubuthwa kwezibi emizini ehlala uzulu kanye lokulungisiswa kwemigwaqo edolobheni le Harare esingamagodigodi lakho uthi ngeminye yemisebenzi eqakathekileyo njalo athi kumele iqhutshwe ngesiphangiphangi.
XS
SM
MD
LG