Uhlelo lokuthuthukisa uBulawayo olwe100 Day Rapid Results Plan lukhangelele ukugqitshwa ngoMabasa lonyaka.
Phansi kwalolu hlelo ikhansili yakoBulawayo ikhangelele ukulungisa imigwaqo, impompi ezithwala amanzi ahlanzekileyo langcolileyo, ukutholisa abantu indawo zokwakha izindlu lamabhizimusi, ukulungisa izibane zemigwaqo, ukwakha izikolo, amakilinika lokulungisa uluhlu lwabantu abalinde ukutholiswa izindlu bekufaka ebulenjini kanye lokuthuthukisa ubulembu bekhansili lokunye okuthile.
UMayor wedolobho lakoBulawayo, uMnu. Martin Moyo uthi njengekhansili sebephume lemisebenzi abazayilandela kumalanga alikhulu alandelayo.
UNkosikazi Sophie Moyo ohlala kuWard 18 eMagwegwe uthi ukwenza kwamaKhansila kutshengisa ukwehluleka.
Umgcinisihlalo wenhlanganiso yezakhamizi eye BPRA uMnunzana Reason Ngwenya laye uvumelane loNkosikazi Moyo ethi uhlelo lolu luyaphutsha kanjani bona bengela lwazi.
Owalwa impi yenkululeko, uMnu. Charles Khumalo uthi lokhansila wakhe lokhe wangenayo wambona kanye emfeni kaphili labantu batholakala lapho okulemali khona lakumihlangano yamabandla abo.
Olwela amalungelo ezisebenzi, uMnunzna Percy Mcijo uthi luhle uhlelo lwekhansili kodwa ukhangelele ukuba ikhansili iphathiswe kwezomnotho ikakhulu kuhlelo abaluthi yiEconomic Special Zone bakhangele ibhizimusi abangena kulo besebenzelana labosomabhizimusi abasebenza bezimele.
Umhlangano lo ungenwe yizisebenzi zeKhansili ezikhokhela inhlelo kunye leziphathamandla ezisuka endaweni ezehlukeneyo edolobheni lakoBulawayo abasole kakhulu ukungabikhona kwamane amakhansila bethi bavele lasemalokitshini abathiwa tshazi okuyinto ezabuyisela muva ukuthuthuka kwedolobho.
Engena embusweni ngemva kokuhluthulela obengumongameli, uMongameli Emmerson Mnangagwa ufake umthetho obamba zonke ingatsha zikahulumende ukuba ziphume lenhlelo abakhangelele ukuzifeza ngamalanga alikhulu kukhangelwa umthetho weZIMASSET ngemizamo yokuvuselela umnotho welizwe osubhazalele ngesisu. Okwenze ikhansili yakoBulawayo layo iphume lolwayo uhlelo lwemisebenzi okumele ifezeke phakathi kwamalanga alikhulu lapho kusiya fika uMabasa.