Umgcinisihlalo wekhansili yeBinga Rural District Council uthi akulalutho olwenziwa nguhulumende ukulungiselela inhlupho ezingadalwa yikuguquka komkhathi ikakhulu umthelela olakho ukulethwa liyezi leEl Nino.
UMnu. Dube Mukombwe uthi kuyamangalisa ukuthi uhulumende uzithulele loba kusobala ukuthi kulakho ukuba lendlala enkulu elizweni ngenxa yokungani kuhle kwezulu.
Uthi kumele uhulumende akhulumisane lezakhamizi ngezomkhathi abantu balungiselele ukusilela kokudla kanye lengozi ezilakho ukulethwa liyezi leEl Nino ezifana lezulu lesikhukhula.
"Kuyadingeka ukuthi uhulumende asiphathise ngokusebenzelana lathi njengezakhamizi ukulungiselala inhlupho ezingasehlela ngoba kusobala ukuthi indlala ikhona, lokho akuthandabuzwa," kutsho uMukombwe.
"Ngakho, kumele kuthengwe ukudla okuzaphathisa abantu ngomnyaka ozayo. Leli yezi leEl Nino lizaletha indlala hatshi lonyaka kuphela kodwa langomnyaka ozayo."
