amalinks wokungena

Breaking News

Uhulumende Ulungela Ukulwisana Lokuqhamuka Kwemikhuhlane Yesihudo


Uhulumende uveza ukuba uselungile ngokugcweleyo njalo uselazo indlela ezizasetshenziswa ukwenqabela ukuqhamuka kwemikhuhlane yesihudo okubalisa Cholera,Typhoid and Dysentry ngesikhathi izulu seliqalile ukuna elizweni kanye lokutholisa uzulu imfundiso phezu kokuqakatheka kokuhlanzeka.

Lokhu kuvezwe emhlanganweni lentathelizindaba owenzelwe emahofisini ogatsha lwezempilakahle lamuhla emini, ngemva komhlangano lezinye ingatsha lenhlanganiso eziphatheke kwezokulondoloza impilakahle kazulu.

Umphathintambo wezempilakahle uDr David Parirenyatwa uthe abogatsha lwakhe bakubone kufanele ukuba babonisane labenhlanganiso ezisebenzelana lohulumende okubalisa eye WHO,UNICEF kanye lomanisipala weHarare.

Umsekeli wakhe laye obekulomhlangano u Dr Paul Chimedza laye ugcizelele ukuqakatheka kokuba bahlale belungiselele sikhathi sonke ikakhulu lapho ingakaqhamuki limikhuhlane.

Kuthi obona ngezokulondolozwa kwempilakahle ekhangela indaba zokulondolozwa kwezemvelo kumanisipala u Dr Stanely Mungofa uthi kuqakathekile njalo ukuba uzulu afundiswe ngokulondolozwa kwezibi kanye lokuba ilahlwa njani imihlobo eyehlukeneyo yezibi.

Abezempilakahle bathi lanxa kuyibo abaphatheka ekwelapheni uzulu nxa kuthe kwaqhamuka imikhuhlane kuqakathekile ukuba abezinye inhlangothi labo okufana labomanisipala kanye logatsha lwezokuthuthukiswa kwezabelo lezinye ingatsha baqhube umsebenzi wabo ngendlela.

Bathi okuqakathekileyo yikuba uzulu uwathola ngesikhathi amanzi ahlanzekileyo,ukubuthwa kwezibi ngesikhathi kanye lokwakhiwa kwezambuzi ngoba kungokunye okungenqabela ukuqhamuka kwali mikhuhlane.

Abe Econet bona babikwa bezaphathisa kulomkhankaso ngokutholisa uzulu imibiko ebafundisa phezu kokuzinakekela sikhathi sonke okufana lokugeza izandla.

Abezempilakahle bathi bazabamba imihlangano labezinye ingatsha ezibalisa olwezentuthuko lokwakha, olwamanzi, olwezemfundo kanye lezinye ukubonisana ukuba kusetshenzwe njani ukuze kwenqatshelwe ukuqhamuka kwemikhuhlane.
XS
SM
MD
LG