Ibhanga elikhulu lelizwe eleReserve Bank of Zimbabwe namuhla lazise ukuthi selethule iZ$50 ebambeneyo ezaqala ukusebenza kusasa.
Usibalukhulu walelibhanga uMnu John Mangudya uthi ihlangene yonke limali izangena kuZ$360 million.
IZ$50 le iba yiyo imali ebambeneyo ephezulu njalo izasebenza ndawonye laleyo evele ikhona ebalisa iZ$2, Z$5, Z$10 leZ$20.
Kodwa osobabhisimusi labathengi bathi lanxa beyamukela limali, ayisoze incede ngalutho nanku ayeneli lesinkwa esisodwa kumbe ukugada umtshova.
“Vele ayilandedo elwenzayo; siyabe lokhe sitshintsha $100, $200, $500, sesibuyela kuloya mnyaka ukuthi siyabe lokhe sifaka ama-zero,” kutsho usomabhizimusi uMnu Bhekimpilo Sithole.
Amazwi kaSithole agcizelelwe yisiphathamandla senhlanganiso emela abathengi eyeNational Consumer Rights Association uMnu Effie Dlela Ncube.
“Ngeke kuncede ekuthini imali yekele ukusilela emabhanga, akusoze kwenze alayini emabhanga aphele. Kuzakwengeza futhi imali esemphakathini, i-money supply ngesiNgisi, okuzakwenza ukuthi izinto zikhwele,” kutsho uNcube.
Ukugugudeka kwedola leZimbabwe kwenza ukuthi uzulu ahambe ethwele imali enengi esiyathenga ngitsho lesinkwa sibi saso, sona esibiza iZ$130.
Inhlawulo yemitshova leyamabhasi eZupco yona ikhwele ngeviki edluleyo njalo isiqala kuZ$60.
Lokhu kwenza iZ$50 entsha le ingabi lonhlonzi, kutsho unobhala jikelele wenhlanganiso yezisenenzi iZCTU uMnu Japhet Moyo.
“Incane sibili limali nxa siyikhangela nge-inflation ekhona phakathi kwelizwe, ayisiyomali esingathi ingama le-impact kumbe inganceda,” kutsho uMoyo.
Impawu zalimali zigoqela umfanekiso kambuyanehanda kanye lethuna lebutho elingaziwayo eliseHeroes Acre.
USithole uthi ukwethulwa kwalimali buthumuthumu abantu bengafundiswanga luthi ngalezimpawu kulakho ukudala udubo.
“Kuqala kwakusithi nxa imali iphuma kwakuqala ku-consultwe abantu,” kutsho uSithole ekhuluma leStudio 7.
“Thina osomabhizimusi kumele sivikeleke ngona khathesi abantu bayabe bengakabiwazi ama-features email leyo; ngakho bekuqakathekile ukuthi uhulumende aqale achasisele abantu ukuthi iZ$50 le entsha iyabe inje.”
Bakhona abathi bekudingeka ukuthi uhulumende ethule iZ$100 kumbe iZ$200 ebambeneyo. Sehlulekile ukukhuluma loMangudya ngaloludaba.
