Ugatsha lwezempilakahle luthi bahlanu kuphela abantu ababanjwe umkhuhlane weCovid-19 izolo eZimbabwe njalo akekho obhubhileyo.
Inani lalabo asebebanjwe lumkhuhlane selokhu waqhamukayo likhwele ngabahlanu laya ku7531. Asebesilile bona bakhwele ngabalitshumi lanye baya ku5690.
Asebefile balokhu besedlula kancane amakhulu amabili, 224. Abalokhu bephethwe ngumkhuhlane lo bangu1617.
Kulezinsuku inani lababanjwa lumkhuhlane labafayo likhanya lisehla nxa kuqathaniswa lensukwini ezedluleyo.
Uhulumende yena useyekethisile njalo iziqondiso zokwenqabela ukumemetheka kwalumkhuhlane ngokuqhelisa isikhathi sokuvulwa lokuvalwa kwamabhizimusi.
Umphathintambo obona ngokwethulwa kwemibiko uNkosikazi Monica Mutsvangwa wazise izolo ukuthi amabhizimusi asezavulwa kusukela ngo6:30 ekuseni aze ayevalwa ngo6:30 ntambama.
Kungakethulwa linguquko, ebevulwa ngo8:00 ekuseni avalwe ngo4:30.
Isiphathamandla senhlanganiso yabaphila ngokuthengisa eyeBulawayo Vendors and Traders Association uMnu Aleck Ndlovu utshele iStudio 7 ukuthi bayalijabulela lelinyathelo.
