amalinks wokungena

Breaking News

Uhulumende Uphawula Okusemthethweni Iziqondiso zeWHO HIV Guidelines


WHO
Uhulumende ephathiswa zinhlanganiso asebenzelana lazo kwezempilakahle, uphawule okusemthethweni uhlelo lweziqondiso eziphathelane lokulwisana lokusabalala kwegciwane kuzulu we Zimbabwe olwe New 2013 National Consolidated WHO Guidelines for Anti-Retroviral Therapy & Treatment of HIV in Zimbabwe. Ukusetshenziswa kwalezi ziqondiso kutsho ukuba umuntu sekuzamele athathe imithi yokuzivikela kugciwane ama ARV nxa ethe watholakala ele CD4 eku 500 okuzabangela ukuqansa kwenani lalabo abathatha lamaphilisi lisuka kunkulungwane ezingamakhulu ayisitshiyagalombili ( 800,000 ) abanatha limithi lisiya kwabedlula kancane isigidi ( 1,2million ).

Emazwini akhe okuphawula loluhlelo okusemthethweni, emkhosini owenzelwe e Rainbow Towers lamuhla,umsekeli kamphathintambo wezempilakahle, u Dr Paul Chimedza uthi eleZimbabwe ngelinye lamazwe awezwekazi le Africa alokhe esabhekane lodubo lokuqansa kwenani labale gciwane kanye lengculaza ngoba kusengezwa njalo ludubo lomkhuhlane wofuba i TB. Utshele intathelizindaba ukuba lanxa imithi esetshenziswa kuloluhlelo olutsha ibiza intengo ephezulu njalo luzakwengeza inani labadinga ukutholiswa ama ARV, uhulumende ululungiselele yikho ekubone kufanele ukuba lusungulwe ekuqaleni komnyaka.

Kuthi ummeli wenhlanganiso ebona ngezempilakahle umhlaba wonke eye WHO kuleli u Dr David Okello yena uthi abenhlanganiso yakhe balubona luzaphathisa kakhulu ekulwisaneni lokumemetheka kwegciwane kanye labalahlekelwa yimpilo ngoba belengculaza.

Kuthi okhokhela uhlangothi olubona ngezemikhuhlane ebalisa olofuba, i HIV kanye lengculaza kugatsha lwezempilakahle u Dr Owen Mugurungi uveze ukuba sekudinga ukusebenzelana kwenhlangothi zonke ukudinga indlela zokutholiswa kokudingakalayo ngesikhathi luqhutshwa loluhlelo ngoba ethi ilizwe lilakho ukuluqeda loludubo njengokufisa kwalo.

Umgcinisihlalo weboard enhlanganisweni ye National Aids Council of Zimbabwe umnumzana David Mutambara uthi loluhlelo luza ngemva kokuba ilizwe lisanda kuphawula olunye uhlelo njalo oluthiwa yi Option ‘ B ’ plus oluhlose ukwehlisa ukusabalala lokuthelelanwa kwegciwane okubalisa elivela kumama lisiya kungane phakathi kwawonalo umnyaka.

Abezempilakahle bakhuthaza uzulu ukuba ayehlolwa aphange atholiswe usizo lalapho engaguli ngoba bethi kuphathisa ukuba aphile okwesikhathi eside lapho etholakale elalo igciwane.

Abe NAC bathi lokhu kuzaphathis ekuthini ilizwe libe labantu abaphilileyo njalo bezalisebenzela,okuzaphathisa ukuthuthukisa umnotho welizwe.
XS
SM
MD
LG