amalinks wokungena

Breaking News

Uhulumende Uthi iCovid-19 Isigxile Impande eEmakhandeni laseNkulumane


Wilkins Hospital - Preparation for Covid 19 Vaccination

Lanxa ugatsha lwezempilakahle lusithi amalokitshi abalisa iNkulumane, iEmakhandeni kanye leNothernd yiwo atshisayo ngeCovid-19 koBulawayo, inengi kulezindawo lithi lisemnyameni nje alazi lutho.

Uhulumende wazise ngoMvulo ukuthi amalokitshi la yiwo alabantu abahlaselwe yilumkhuhlane ngobunengi kulelidolobho kulezinsuku njalo asesibayeni sinye lendawo ezifana leChiredzi, iKariba, iKaroi leKwekwe, zona ezivaliweyo sikhuluma nje.

Kodwa lanxa kunjalo, abantu bakhanya bengagqize qhakala nanku bayaqhubeka ngempilo yansukuzonke kungelani lokuthi uhulumende useqinise imigoqo yokwenqabela ukumemetheka kwalumkhuhlane kusukela.

“l-lockdown le ekhona isemaphepheni kodwa thina sibili ngapha asiyiboni, lokhe kufanana nje akulanto etshintshileyo,” kutsho isakhamuzi seNkulumane uNkosikazi Sanele Moyo.

“Akula mahluko okhona, ngizwa khathesi kuthiwa iNkulumane layo yi-hotspot yeCovid kodwa thina abahlali bakhona asilalwazi. Ngabe siyalimukiswa ngoba lokhe siziphilela njengokuthi siziphilela njani.”

Ukudingisisa okwenziwe yiStudio 7 koBulawayo kuveze ukuthi abathengisayo bebezisebenzela njengenjwayelo njalo amapholisa ebengabonakali emigwaqweni.

Isakhamuzi uNkosikazi Prim Mpofu uthe lanxa bewesaba umkhuhlane lo, kunzima ukuthi bahlale phansi ngoba kumele baphandele imuli zabo.

“Ngabe kukhona uhulumende asinika khona besizalandela ukuthi singaminyani sithengisa. Esizakwenza yikuthi sigqoke ama-mask sisebenza ngoba vele akukhanyi lutho olukhona. Abantu bagcwele emigwaqweni, akula-maroad block wonke umuntu wenza okwakhe,” kutsho uMaMpofu

Esinye njalo isakhamuzi uMnu Dumisani Sibindi uthe kulokhe kulokuminyana kwabantu emabhasini eZupco, khona athi kulakho ukumemethekisa umkhuhlane weCovid-19.

“Abantu bayazihambela nje, angazi ukuthi kungani kuthiwe ama-church avalwe yona i-corona igcwele emabhasini, e-church kungcono kule-social distancing.”

Umqondisi wesibhedlela seMpilo uMnu Solwayo Ngwenya yena uxwayise ukuthi “ubhubhane lolu solusehlandleni lesithathu okuthiwa yi3rd wave. Lapha koBulawayo eNkulumane eMakhandeni leNorthern Suburb yikho lapha osoluvimbe khona kakhulu. Siyalixwayisa ngoba ubhubhane lolu solumemetheke kakhulu. Abantu abazibambe, sesisebunzimeni obukhulu.”

Kusenjalo, ugatsha lwezempilakahle lwethule umthetho weStatutory Instrument 170 ngoLwesibili okumele ulandelwe ngesikhathi lesi kuvalwe ilizwe.

Imota ezithwala abantu akumelanga zidlulise inani elivunyelweyo kuthi lapho abantu besehla kumele imota igeziswe ingakaze ithwale abanye njalo.

Amabhizimusi azavula kusukela ngehola lesitshiyagalombili ekuseni avalwe ngehola lesithupha ntambama. Imibuthano yonke egoqela inkonzo isimisiwe kuthi izimfa zivunyelwa abantu abangamatshumi amathathu, 30, kuphela.

Indawo ezigoqela iHurungwe, Kariba leKwekwe lapho okubhahe khona lolubhubhane kuzabe kulemigoqo ye-cufew eqala ngehola lesikhombisa ntambama, 7pm, kusiyafika ihola lesithupha ekuseni, 6am.

Indawo zonke zokufundela sezivaliwe.

please wait

No media source currently available

0:00 0:05:33 0:00

Facebook Forum

XS
SM
MD
LG