amalinks wokungena

Breaking News

Uhulumende Uthi Umdlalo Wenguqu Usungaqala Ukudlalwa


Zifa

Isizaqala imidlalo yenguqu kwele Zimbabwe ngemva kokuba uhulumende eyamukele isicelo senhlanganiso yeZimbabwe Football Association esokuba amaqembu aphindele ezinkundleni.

Umkhokheli wenhlanganiso ye Zifa uFelton Kamambo utshele intathelizindaba NgoMvulo ntambama ukuba bazaxoxisana labaphatheke emdlalweni wenguqu elizweni phezu kokuba imidlalo izahlelwa njani.

Umphathintambo wezemidlalo lokuzilibazisa uKirsty Coventry yena uthe ukuhulumende uvumile ukuba imidlalo yenguqu kumele iqale kodwa kuzamele kuvunyelwane ukuba kuzadlalwa njani.

Ezemidlalo zimisiwe kwele Zimbabwe ngenyanga ka Mbimbitho ngemva kokuqhamuka komkhuhlane we Covid 19.

Umlandeli womdlalo wenguqu uSibonakaliso Ndlovu uthi kuyinto enhle ukuba umdlalo wenguqu uphenduke kodwa kuzamele kuqiniswe inhlelo zokuvikela abadlali.

“Mina njengomlandeli womdlalo wenguqu ngizakholwa ngokubona ngoba kunengi okumele kwenziwe ukuze kuvikelwe abadlali kanye labo bonke abaphatheka kumdlalo wenguqu njalo lezonhlelo zibiza imali enengi.

Phezu kwalokho vele lakumabonakude vele sihlezi singaliboni ibhola lakhona yikho asazi kuzaphathwa njani okuyindaba kwakhona,” kutsho uNkosazana Ndlovu.

Kusenjalo isizini entsha eyomdlalo wenguqu kwele Ngilandi iqale ngempelaviki eyedluleyo.

Amaqembu athole imiklomelo emithathu ngemva kwemidlalo eyeviki elakuqala eye English Premier League ngabalisa ele Arsenal, ele Leicester, eleNewcastle, ele Liverpool, ele Crystal Palace kanye lele Everton.

Iqembu le Arsenal lele Leicester yiwo akhokhela phezu kwengalane ngoba enqobe ele Fulham lele West Brom nge 3 ka nya kuthi ele Newcastle lona elihlezi endaweni yesithathu linqobe ele West Ham nge 2 ka nya.

Iqembu eliphethe isicoco ele Liverpool linqobe ele Leeds nge 4 ka 3 njalo kuyo yonke imidlalo esidlaliwe akula ofike emaphethelweni kungelaqembu elihlohlileyo okuyisimo esichazwe yintathelizindaba yezemidlalo uNash Mkokwayarira njengesibonelo esokuba abadlali imizimba isasebuthakathaka.

“Amaqembu amakhulu abalisa abo Liverpool kanye le Arsenal aqhube kuhle kodwa lalo iqembu ebeselileminyaka eminengi lingekho kusigaba saphezulu lalo lidlale kuhle lidlala lele Liverpool.

Into ekhona nje yikuthi kumidlalo yonke esidlaliwe kuvele obala ukuba abadlali abakafiki kuzinga leliyana esilijwayeleyo,” kutsho uMkokwayarira.

Imidlalo obekumele idlalwe ngoMgqibelo phakathi kwe Burnely le Manchester United kanye lobekumele ube phakathi kwe Manchester City kanye le Aston Villa idluliselwe phambili kuyindlela eyokupha amaqembu awe Manchester ithuba lokuphumuza abadlali ngoba womabili abephatheke kumidlalo eyokudinga intshantshu zezwekazi lase Europe.

Imidlalo iqhubekela phambili namhla lapho iqembu le Sheffield United elizadlala lele Wolves kuthi ele Brighton lizangqikilana lele Chelsea.

Kolunye udaba olumayelana lomdlalo wenguqu, iqembu le Mamelodi Sundowns liphalamise inkezo ye Nedbank Cup ngoMqgibelo ngemva kokutshaya ele Bloemfontein Celtic nge 1 ka nya ku final.

Limpumela itsho ukuba iqembu le Mamelodi Sundowns liphakamise inkezo ezintathu kusizini ephelileyo njengoba kuyilo elithethe inkezo ye Telkom Knockout kanye lesicoco seligi.

Iqembu le Bloemfontein lizamela ilizwe le South Africa kumncintiswano we CAF Confederations Cup ndawonye lele Orlando Pirates kuthi ele Sundowns lona lizamela ilizwe le South Africa kumncintiswano we CAF Champions League ndawonye lele Kaizer Chiefs.

Facebook Forum

XS
SM
MD
LG