Uhulumende ubikwa ethwele nzima ngokuphanda imali yokunanza izikhalazo zabodokotela akhalala umsebenzi eZimbabwe ekhonona ngeholo eliphansi lokunye okutshiyeneyo.
UDokotela Lovemore Mbengeranwa umqondisi weHealth Service Board utshele iStudio 7 ukuthi uhulumende lokhe ehlolisisa izikhalazo zabodokotela abangakabi lesikhathi eside besebenza, abafuna njalo ukuthi kukhuphulwe ezinye izimali okumele bazithole zama allowance.
UDokotela Mbengeranwa uthe uhulumende uzimisele ukulungisa okuhlupha odokotela laba loba nje kumele bamelele ukwethulwa koluhlu lokusetshenziswa kwemali yelizwe i-budget ngumphathintambo wezemali ngoMpalakazi.
Kodwa-ke bona bathi bafuna uhulumende agcwalise ezinye izikhalazo zabo kungakafiki isikhathi leso.
Kusenjalo, izibhedlela ezinengi zikahulumende zibikwa ziselapha abantu abagula kakhulu kuphela njengoba labodokotela asebahlala okwesikhathi eside ezibhedlela zikahulumende sebekhalele umsebenzi.
Bathi sebesindwa ngumsebenzi ngenxa yokungasebenzi kwama junior doctors abahola amakhulu phoe amathathu amadollar ngenyanga - US$283. Uzulu usekhala ngokuthi abantu makhaza abaxotshwa ezibhedlela zikahulumende kabenelisi ukubhadala inhlawulo yokwelatshwa kumadokotela azimele wodwa.
Sixoxe lesakhamuzi seVictoria Falls, Umnu. Mpumelelo Gumbo, otshele uGibbs Dube weStudio 7 ukuthi abantu abanengi sebedinga usizo enyangeni zomdabuko njengoba kungelabodokotela ezibhedlela.