amalinks wokungena

Breaking News

UKhama Usuka Esikhundleni Sikamongameli


UMongameli wakwele Botswana, uLt Gen. Seretse Khama Ian Khama, usesuka esikhundleni sikamongameli.

UMongameli Ian Khama wakwele Botswana uzaphuma lamuhla esihlalweni anikeze intambo zombuso umsekeli wakhe ngemva kweminyaka engamatshumi ebusa. Izizalwane zeZimbabwe zithi kuyancomeka okuzakwenziwa nguKhama.

UKhama ukhangelelwe ukuthi uzanikeza intambo zombuso uMokgweetsi Eric Masisi, ozagcotshwa kusasa ukuba ngumongameli wakwele Botswana. Ukusuka kuka Khama esikhundleni lesi kumunyethwe yisisekelo sombuso welizwe leBotswana.

UKhama wangena esikhundleni lesi ngomnyaka ka2008.

Izizalwane zeZimbabwe ezihlala kwele Botswana zithi kuyabukeka ukuthi intambo zombuso ziqhutshelwana kungela kulwisana njengalokho okujayele ukwenzakala kwamanye amazwe kuzwekazi leAfrica.

Omunye wabancoma okwenzakala kwele Botswana nguMnu. Dumisani Ncube othi lokhu yisibonelo esihle, ikakhulu emazweni enjenge Zimbabwe.

"Elizweni leBotswana sibona umbuso wabantu lapho okungadingakali ibutho ukuze kususwe umongameli. Lokhu kutshengisa ukuthi umbuso wabantu lokhe ukhona kwele Botswana."

UMnu. Nkazimulo Dube laye uthi okwenzakala kwele Botswana akujwayelekanga kuzwekazi leAfrica.

Isisekelo sombuso welizwe leBotswana sikubeka sobala ukuthi umongameli kumele atshiye isikhundla lesi ngemva kweminyaka elitshumi.

"Esikubona kusenzakala eBotswana kuyinto enhle kakhulu, akusiyonto ejayelekileyo eAfrica, ikakhulu sikhangele okwenzakale eZimbabwe. Ngibona lokhu kuyisifundo esikhulu kwamanye amazwe eAfrica."

Ukungena kuka mongameli omutsha kwele Botswana kuza ngesikhathi kubelenguquko kubo hulumende kwele South Africa kanye leZimbabwe ngoNhlolanja lonyaka lango Lwezi nyakenye. Emazweni la, omongameli baphume sebethwaliswe nzima ngabasekeli bamabandla abo abusayo. Kwele Zimbabwe, ibutho lincedise ukususa esikhundleni owayengumongameli uMnu. Robert Mugabe.

Intathelizindaba yeStandard, uMnu. Nqobani Ndlovu, uthi zinengi izifundo ezingaphuma kokusanda kwenzakala ngakumhlubulo ongezansi kwele Africa.

"Okujabulisayo yikuthi lokhu akujwayelekanga ukuthi sibone amazwe amathathu entshintsha inkokheli. Njalo okuqakathekileyo yikuthi kweneliseka ukuntshintsha inkokheli kungazange kuchitheke igazi."

Ukungena kukamongameli omutsha kwele Botswana, akudingi khetho ngoba uMasisi uyabe ebambile kuze kufike ukhetho lomnyaka ozayo. Kodwa akukhangelelwanga ukuthi kuzaba luntshintsho njengoba uMasisi ekhangelelwe ukuthi uzaqhubeke engumongameli weBotswana kusiya phambili.

AbeZimbabwe bakhangele ukuthi kambe uMasisi ubaphatheleni, ngemva kokuthi uKhama atshengise ukuthakazelela okwenzakala eZimbabwe.

Udaba Esilethulelwe NguMartin Ngwenya
please wait

No media source currently available

0:00 0:02:29 0:00

Facebook Forum

XS
SM
MD
LG