UMnu. Jabulani Sibada owayekhokhela inhlanganiso yalabo abalwa impi yenkululeko uthi akwethusi okwenzakala kubandla le Zanu PF ngenxa yokuthi uMongameli Robert Mugabe kaselamandla okukhokhela ibandla leli ngemfanelo.
USibanda uthi kuzaqhubekela phambili ukulwisana lokhu kubandla leli lapho okubangiswana khona isikhundla sikaMugabe yilabo abazibiza besithi yiGeneration 40 esekela uNkosikazi Grace Mugabe leTeam Lacoste ecatshangelwa ukuthi ngeMnu. Emmerson Mnangagwa umsekeli kaMugabe.
USibanda uthe konke lokhu kutshengisa ukuthi ibandla leZanu PF selibhidlika ngempela.
“Okusobala yikuthi uMugabe usesehluleka ukukhokhela ibandla leli. Okwenziwa ngabalwa impi yenkululeko kukubeka sobala konke lokhu.
“Okuyikho insika yendaba yikuthi ibandla leli selingenwe yimpehlane okutshengisa ukuthi ayisimi labanye bami abacatshangelwa okubi bodwa abanakanelwa ukuthi benza okungayisikho kubandla leli. Lokhu okwakuthiwa ngamaGammatox lama Weavils kwakuyize nje. UMugabe yena ngokwakhe sephelile.”
USibanda labanye bakhe abagoqela uNkosikazi Joice Mujuru owayengumsekeli kaMugabe baxotshwa kubandla leZanu PF becatshangelwa ukuthi babefuna ukuhluthulela uUmugabe umbuso.