Izizalwane zeZimbabwe ezihlala kwele Botswana zithi zidaniswe kakhulu yisinqumo somthethwandaba sokuthi kawusoke uvumele abantu ukuthi bavote bephandle kwelizwe.
Abanye abathi kuzakuba nzima ukuthi bayekhaya ukuyavota ngelanga eselibekiwe elamhlaka 30 kuNtulikazi.
UMongameli Emmerson Dambuzo Mnangagwa usebeke ilanga likamhla ka 30 Ntulikazi ukuthi amabandla ezombusazwe abhuqane kudingwe ozanqoba kukhetho.
Ngelanga linye kuphume ukuthi abaphandle kwelizwe abasoke bethole ithuba lokuvota besemazweni lapho abahlala khona.
Lokhu sokudanise abanye abaseBotswana abathi bona basekudeni, ngakho abasoke benelise ukulubhekisa ekhaya ukuyavota, bekhala langendleko zokuhamba.
UMnu. Collen Dumani Mlalazi uthi mhlawumbe uhulumende ulokhe elovalo lokuthi inengi elingaphandle kwelizwe ngabasekeli bamabandla aphikisayo yikho kuvalwe iDiaspora Vote.
“Lababantu bayafana. Ngohulumende abafana lohulumende kaMugabe, bayakwazi ukuthi abantu abaphume phandle kwelizwe baphume ngocuku lwabo njalo bayakwazi ukuthi abantu abasoke babavotele.”
UMnu. Dumisani Ncube uthi njengoba umthethwandaba usuvalile ukuthi abaphandle bevote besemazweni, kuzaba nzima ukuthi benelise ukuya ekhaya mhlaka 30 Ntulikazi.
“Kuzabanzima ukuya ekhaya ngoba abanye ngaba balisi njalo izikolo ziyabe zingakavalwa, okukuthi ngabe besezivaliwe, abanye kade beza kwenelisa ukuhamba bayevota. Kulendaba yendleko zenhambo ngakho siyadana ukuthi bayalile ukuthi sivote singaphandle.”
Abasemadolobheni afana le Gaborone, kuzamele batshone eskhwameni bakhoke amaPula edlula inkulungwane - P1,000 - yokugada uma befuna ukuhamba ukuyavota ekhaya.
UNkosazana Sipho Dube uthi akukho abangakwenza njengoba ilanga selibekiwe. Uthi labo abazakwenelisa bazahamba kukanti-ke abanye bazakwehluleka.
“Akula okunengi okungenziwa ngelanga eselibekiwe. Abanye bazahamba ngoba kade bevele bezahamba. Kwabanye kuzabanzima ikakhulu sikhangele indleko yikho abantu babekhala ngokuthi bavote besemazweni abahlala kuwo.”
EleZimbabwe alikaze livumele abasemazweni ukuthi bavote noma nje kulezigidi lezigidi ezisemazweni agoqela iAustralia, Botswana, New Zealand, South Africa, United Kingdom, United States, Canada lamanye.
Inengi njalo alenelisanga ukuloba amagama kuluhlu lwalabo asethole ilungelo lokuvota ngenxa yokuba khatshana lekhaya.