amalinks wokungena

Breaking News

Ukhetho Lwama Primary eMDC-T Ludala Inkulumo


Imota eyatshaywa ngabanye abalandeli bebandla leMDC-T ekhokhelwa nguMnu. Nelson Chamisa.

Ukungangqobi kukhetho lwama primaries kwenye inkokheli yebandla le MDC-T elikhokhelwa nguMnu. Nelson Chamisa sokudale ukwesabela ukuthi lelibandla lingacina lingqotshwa kukhetho oluzayo.

Inkokheli esizasuka edale lephalamende ibalisa uMnu. James Maridadi abanengi abathi ubesebenza gadalala edale, uMnu. Jameson Timba, uNkosazana Lynette Karenyi labanye abanenginengi. EHwange, uMnu. Daniel Molokele ngeSonto ungqobe obemela iHwange West edale lephalamende uMnu. Brian Tshuma ngamavoti amanengi.

Kodwa ezabelweni ezingamatshumi amahlanu kubikwa kulokukhonona ngendlela ukhetho oluphathwe ngayo.

Osaphethe isikhundla sikamgcinisihlalo webandla, uMnu. Morgan Komichi utshele intathelizindaba ukuthi ibandla liyazama ngamandla wonke ukuthi ukhetho luhambe ngemfanelo.

KoBulawayo khona kubikwa kulezikhalazo ezinengi ezibalisa ukubandlalulana ngemihlobo. Kubikwa abakhuluma ulimi lwesi Shona beyibo abanengi kakhulu abazamela lelibandla kukhetho lokudinga amakhansila.

Ezinye izikhalazo zabasekeli bebandla leMDC-T ko Bulawayo ngezokuthi inkokheli yiyo ekhethela uzulu abazancintisa.

Sixoxe lomsekeli webandla leli koBulawayo. UNkosikazi Sebenzile Khumalo ukuze sizwe izikhalazo zabo.

Ukunqoba kwabasakhulayo abanengi ekhethweni lokudinga abazamela ibandla leMDC-T elikhokhelwa nguMnu Nelson Chamisa kukhetho oluzayo sekudale imibuzo eminengi ebalisa ukuthi ibandla leli lizathola na ingqubelaphambili kumbe sekube yikufa kwalo ngenxa yentsha engelalwazi olujulileyo ekuphatheni kwezombusazwe.

Kunjalo nje, ibandla leMDC-T leli ligqibe umsebenzi walo wokudinga abazalimela izolo lapho okukhanye khona ukuthi abanengi ababengosahoho banqotshwe ngabasakhulayo akade beqala uhambo lwabo kwezombusazwe.

Ingcwethi kwezombusazwe ezikhulume leStudio 7 zithi ibandla leMDC-T libandla eselilikhulu kakhulu njalo okufuze lilondolozwe ngazo zonke indlela ukuze izizalwana zakuleli zithole ukubuswa okungcono.

Abanye bathe izikhathi seziguqukile njalo lombuso sekufuze uguquke ubesezandleni zabatsha abalokhe besakhangelele ukuthi balungisise impilo yabo leyabantwababo.

UMnu. Decent Makuzwa uthi sekuyisikhathi sabasakhulayo ukuthi babuse njalo abadala nxa begxilile, ibandla leMDC T kalisoze liyendawo.

Omunye njalo uthe kusina kudedelwana okwenza into enziwe ngabaladeli be MDC T icomeke kakhulu.

Sesabanika ithuba labo abadala benza ababekukwanisa. Umdlalo wezombusazwe sekufuze uguquke njalo yinto esingeke siphikisane layo leyi. Ukuphumelela kwethu kusezandleni zabantu abalengqondo ezisaselokukhalipha.

Unkosazana Bridget Ncube uthe impumela yokhetho lolu yadalwa yikuza kukaMnu Chamisa enkudleni yezombusazwe lomkhankaso wakhe weGenerational Consensus ekukhothameni kukaMnuMorgan Tsvangirai kuNhlolanja walonyaka.

Kubikwa umkhankaso kaMnu Chamisa lowu wawungowokukhuthaza uzulu ukuthi sekuyisikhathi sokuguqula umbala lendlela izinto ezazisenzwa ngayo ngokupha ithuba kawabasakhulayo.

UMnu. Thomas Nkomo ongumlandeli webandla leMDC-T uthe ukhetho lwahamba kuhle njalo loba kulabasakhulayo abangenileyo, abadala abakhona benela ukunikeza usekelo oludingekayo ukuze ibandla lingafi.

Ngibona ingathi abasakhulayo abangenileyo bayenelisa njalo labadala ababelenhlanhla yokukhethwa ukuthi basimele kukhetho benele njalo bazenelisa ukupha usekelo olufaneleyo kulaba abasasebatsha.

Kolunye uhlangothi, kutsho ukuthi abadala abakhethiweyo babesenza izinto ezifunwa ngabantu.

Izikhathi seziguqukile, sokumele kusetshenzwe ngoba lomongameli esesilaye ufunukusebenza, ngalokho ngibona ingani abatsha laba bazagijima ngendlela esifuna ngayo.

Kwabanye osahoho ababezibambile eminyakeni edlulileyo abangenelisanga ukukhethwa ukuthi bamelele ibandla leMDC-T nguMnu Elias Mudzuri, njalo abanye ababalela oJames Maridadi weMabvuku (Mabvuku/Tafara), Fani Munengami (Glen View North) and Simon Chidhakwa (Zengeza West) kubikwa impumela yokhetho isingaphuma ngendlela esingabadanisa.

Facebook Forum

XS
SM
MD
LG