Abantu beZimbabwe bayavota kukhetho oluqakathekileyo lamuhla kulemibiko ethi ukhetho lolu kaluhanjiswa ngemfanelo njengoba kulokhe kulabantu abanengi okumangalisayo abafisa ukuvota.
Abantu bame kundwendwe ezinde okumangalisayo ikakhulu emadolobheni lapho abaphikisayo abathi kwenziwa ngabomo yikhomishini yeZimbabwe Electoral Commission (ZEC) ecatshangelwa ukuba idlelana lebandla leZanu PF.
UMnu. Nelson Chamisa, umkhokheli womanyano weMDC Alliance, uthi kusobala ukuthi iZEC izama ukuthi ivimbe abantu emadolobheni ukuthi bavotele umanyano wakhe.
UChamisa, ongavezanga ubufakazi lobu, wethule lokhu ebulenjini bokuzilibazisa obeTweeter.
Ulobe wathi, “Kusobala ukuthi bancidezela abantu abafisa ukuvota. Lokhu kwenziwa ngendlela ezakwenza ukuthi abantu bangavoti, okuyinto engaqondanga.”
UChamisa, ovotelele esikolo seKuwadzana 2 Primary School eHarare, uthi umanyano weMDC Alliance uzanqoba nxa kungelakuqilibezela.
Ukukhonona kwakhe kuveza ukuthi uzakwala ukwemukela impumela yokhetho, okulakho ukuthi kubelodlakela lokutshengisela emigwaqweni.
UMnangagwa, ovotele eSherwood School edolobheni leKwekwe, uthi ukhetho luqhutshwa ngemfanelo.
Lokhu ngokokuqala ukuthi ilizwe leZimbabwe libe lokhetho selokhe kwasuswa owayengumongameli, uMnu. Robert Mugabe, esikhundleni libutho libambisana loMnangagwa lamalunga ebandla leZanu PF.
UMugabe ubike ngeSonto ukuba kasoze avotele ibandla elibusayo ngenxa yokuthi wasuswa esihlalweni sikamongameli okungekho emthethweni.
Uthe kasoze avotele uNkosikazi Joice Mujuru, uNkosazana Thokozani Khupe labanye abancintisa ukhetho lukamongameli ngenxa yokuthi kabalalutho oluveza ukuthi bafisa ukunceda abantu beZimbabwe.
Uthe uChamisa nguye ongani wenza akuthakazelelayo. Katshongo ukuthi uzamvotela kumbe hatshi.
UMugabe uvote elokitshini leHighfields lapho ahlala evota khona selokhe ilizwe lathola uzibuse ngomnyaka ka1980.