Elinye ilunga le MDC Alliance elanqoba kukhetho lommeli weChegutu West kodwa wehluleka ukungena edale lephalamende ngemva kokuba ikomishini elawula ezokhetho, eyeZimbabwe Electoral Commission (ZEC), iphambanise ukumemezela igama lomunye umuntu, selise udaba lwayo emthethwandaba weConstitutional Court, ngemva kokwehluleka kwedale leElectoral Court ukuwahlulela kuloludaba.
Ngemva kokwehluleka ukumemezela igama eliyilo lomuntu owanqoba kukhetho luka2018, kweZEC uMnu Gift Konjana, owebandla leMDC Alliance, waphikisa loludaba emthethwandaba esola ukuphambanisa kwale ikomishini yona eyathi uMnu Dexter Nduna owe ZANU PF nguye owanqobayo edale leEletoral Court kodwa kuze kube manje lokhe loludaba lungakalungisiswa.
Elinye igqwetha lika Mnu Konjana uMnu Moses Nkomo uthi kabasuthiseki ngalokho okwethulwe lidale le Electoral Court lele Supreme Court yikho sebeqonde e Constitutional Court.
"Thina sifuna imvumo yokuba singene eConstitional court ukuba siphiwe amandla okuba siphikisane lesinqumo esaphiwa e Supreme court lase Electoral court.
Abahluleli be Constitutional Court, uBen Hlatshwayo u Paddington Garwe lo Marry Gowora batshele amagqwetha ka Konjana laka Nduna ukuba balethe izizatho zabo phambi kwedale besithi bazakhangela udaba lolu ngoLwesibili lweviki ezayo.
"E Electoral court idale lathi sasebenzisa indlela ezingayisizo, kodwa lokhu kakhukho emthethweni yikho saya e Supreme court. Lapho esatshelwa khona ukuba udaba lwethu kumele luphele ngemva kwenyanga ezintathu, kodwa alusaphelanga thina sibaphe amaphepha ethu ngesikhathi esafaneleyo.”
Ingcitshi kundaba zemithetho yezokhetho esebenza phansi kwenhlanganiso ye Zimbabwe Elections Resource Centre, uMnu Takunda Tsunga uthi udaba lolu kumele ngabe lwalungisiswa kudala ngabe iZEC yenza umsebenzi wayo kakuhle.
"Kudaba luka Konjana kakulani lokuthi umthetho ulungisiswe. Umthetho okhona kumele ulungise indubo ezikhona nxa sikhangelane lezokhetho. Umthetho uthi kungaba lokuphambaniseka kumele kulungiswe yi Electoral court kumbe kubalwe kutshwa amavoti"
Ingcitshi kwezombusazwe uMnu Bekezela Gumo uthi udaba luka Mnu Konjana lwenza ukuba uzulu we Zimbabwe aswele ithemba kumadale awe ZImbabwe.
UMnu Konjana utshele iStudio 7 ukuba kasoze aphumule aze anqobe kudaba lwakhe.
Umholi we ZEC uMnu Utoile Silaigwana utshele iStudio 7 ukuba iZEC kayilani lodaba lolu njalo nxa lusasemadale kabazose bakhulume okunengi.
Kodwa iZEC yavuma ukuba yiyo eyaphambanisayo ngokuqamba uNduna ukuba wanqoba eChegutu West khona kungu Konjana.
Sokuyiminyaka emithathu selokhe uKonjana ezama ukulungisa udaba lolu emadale.
IStudio 7 kayizwanga icele lika Mnu Nduna ngoba amaqgwetha akhe kawakasi amaphepha okuphendula loludaba emithethwandaba.