Uzulu koBulawayo wamukele ngenjabulo uhlelo lwamafoni lokunceda abantu ababhekane lobunzima bokungenelisi ukubhalisa kugwalo lokuvota.
Bathe yenze kahle ikhomishini yeZimbabwe Electoral Commission eyethulele uzulu incingo zama toll free lines atshaywa kungelanhlawulo.
Inombolo lezi zimbili enye isebenza kulabo abalomakhalekhukhwini wenkampani yeEconet kuthi enye isebenza nge Netone.
UNkosikazi Gladys Mabhena, isakhamuzi sakoBulawayo, uthi lokhu kungabasiza kakhulu ngoba abalalwazi lokuthi yona indlela yokubhalisa ngeBiometric Voter Registration isebenza njani njalo belokhe bengakahlangani labantu beZEC ukuthi babafundise ngayo.
Emavikini adluleyo kuvele ukuthi koBulawayo kulabantu abalutshwana ababhalisa ukuvota nxa kuqathaniswa lamanye amadolobho. Ababona ngezokhetho kunhlanganiso ezizimele zodwa bathi lokhu kubangelwa yikusweleka kolwazi kanye lokukhathala ngoba ukhetho lungavamanga ukuletha inguquko elizweni.
UMnu. Nkosana Khumalo, owenhlanganiso yezakhamizi eyeCombined Bulawayo Residents’ Association, uthi leli linyathelo lihle kodwa IZEC kumele ilungise inombolo lezo ngoba kunje kazisebenzi kuhle.
UNkosikazi Chelesile Mathema, esinye laso isakhamuzi, uthi inombolo lezo zize ngesikhathi esihle kakhulu njalo zizasiza uzulu ohlala esalele emuva ngokuswela ulwazi.
Umphathintambo obona ngezemali, uMnu. Ignatious Chombo, uphume kumaphephandaba esithi uhulumende useqala ukuhlolisisa ukuthi uzulu angancediswa njani ukuthi enelise ukubhalisa ukuvota kungela nkinga ngoba inengi besehlulwa yikukhipha ubufakazi bokuthi bahlala ngaphi.